Atualità
Dala Junta: bandida speziala por proiec te arees de crisa
La Junta provinziala á aprové incö na bandida speziala de 1,2 miliuns de euro por le finanziamënt di proiec a sostëgn dles popolaziuns de arees de crisa.
Sön la basa di svilups tragics ti raiuns de crisa dl Oriënt Vijin y tles regiuns dl’Africa dl Nord á la Junta provinziala preodü por le 2016 na bandida ajuntiva por les regiuns y les popolaziuns atocades da veres y da desgrazies y che é insciö te condiziuns de gran emergënza economica, soziala y sanitara. La bandida mët a desposiziun ressurses por indöt 1,2 miliuns de euro „cun l’obietif da sostigní les popolaziuns ti raiuns de crisa y por la promoziun dl reinserimënt di migranc tles regiuns de provegnënza ti Paisc dl’area dl Oriënt Vijin, dl’area dl Mediterran y dl’Africa dl Nord“, á recordé le presidënt Kompatscher. Al ti vëgn dé n’atenziun particolara ai intervënc ti ciamps cun profugs tl Lebanon y dla Jordania y al sostëgn de families y comunités che i ospitëia, y ince a scomenciadies de sostëgn al reinserimënt di migranc tles arees de provegnënza.
La bandida reverda proiec proponüs da organisaziuns y ënc zënza fins de davagn cun süa sënta legala o operativa tl Südtirol y che é atives tl ciamp dla cooperaziun al svilup y di aiüc umanitars. Tl spezifich vëgnel sostigní proiec anuai por la promoziun dla segurëza alimentara, por la scombatüda cuntra la malnutriziun y les desgrazies naturales, mosöres de formaziun por i profugs y migranc, promoziun dl azes ai sorvisc soziai de basa, al’assistënza sanitara de basa y al ega da bëre, sostëgn ales vitimes de violënza dantadöt mituns y ëres, scomenciadies por favorí l’ocupaziun por porsones en dificolté y la promoziun dl reinserimënt di migranc tles sozietés di paisc de provegnënza.
Les domandes por n finanziamënt de proiec pó gní presentades cina al 1 de setëmber dl 2016 ala Repartiziun Presidënza y Relaziuns cun l’Ester – Ofize Chestiuns de cabinet dla Provinzia. I proiec pó gní cofinanziá cina al 90 porcënt dles spëises ametüdes. Le formuular por la presentaziun dles domandes pó gní consulté sot a: www.provincia.bz.it/cooperazioneallosviluppo/service/modulistica-download.asp
rc
