Atualità
#prömtëmp Kompatscher/1: partezipaziun y plü lerch ai zitadins
Partezipaziun, responsabilisaziun di zitadins, credibilité dla politica: chëstes é les diretives sotlignades da Arno Kompatscher tratan l’incuntada cun i media.
Na politica dla Junta provinziala basada sön la partezipaziun, cun plü autonomia d’aziun y de plü responsabilités por i zitadins y de plü credibilité tles istituziuns: chëstes é stades les diretives de basa dl laur politich dl presidënt dla Provinzia Arno Kompatscher, che á chirí fora la fortëza de Franzensfest por süa incuntada de #prömtëmp cun i media. Le presidënt á ince presenté so bilanz y antizipé n valgügn vari por le dagní. Al é sté dui agn y mez de laurs intensifs, mo ince da ester contënc dal punt de odüda di resultac. „Conscidran la mudaziun di scenars politics, soziai y economics t’Europa sun stá bugn da cherié la fondamënta por le svilup dl Südtirol, dl’autonomia, dla sozieté y dles impreses, laoran deboriada por le bëgn dla comunité“, á dit le presidënt Kompatscher rengrazian dla colaboraziun i parlamentars a Roma, le Consëi provinzial, i ombolc y les comunités comprensoriales. Kompatscher á recordé la Junta ê piada ia cun l’impëgn da fá na politica nöia basada sön trëi pilastri: partezipaziun, lerch d’aziun y credibilité. „La partezipaziun ó dí mët da jí prozedöres en colaboraziun cun i grups d’interes y i zitadins: i ún organisé por vigni dessëgn de lege na seria de incuntades publiches sön les problematiches plü desvalies por valuté propostes y soluziuns denant co tó les dezijiuns“, á dit Kompatscher fajon i ejëmpli dla lege söi apalc, dla reforma dl sostëgn al’economia, dla gestiun dles üties da munt, dl plann sanitar provinzial, dla reorganisaziun tl setur energetich, l’aeroport, l’impostaziun dl bilanz y le Parch tecnologich.
A chësta metoda corespogn la credibilité, „na politica che sides buna da trasmët crëta ai zitadins: fá chël che é gnü anunzié“, á recordé le presidënt. La basa é le program de coaliziun („che vëgn controlé regolarmënter por ajorné l’atuaziun dles mosöres“), y un di ejëmpli é la reforma sanitara, che vá inant sciöche scrit dant dal program de coaliziun: analisé, otimisé, razionalisé. N conzet che le Landeshauptmann á stlarí ince tres le terzo pilaster: la lerch d’aziun y la responsabilité di zitadins. „Les preocupaziuns di zitadins vëgn analisades dër avisa, al vëgn registré dötes les propostes y esigënzes, mo al ne é nia poscibl da ademplí a dötes les ghiranzes: an fej ci che é poscibl y ci che é por le bëgn de döta la coletivité“, á dit Kompatscher. Le compit dla politica é chël da cherié les condiziuns generales y nia da ciafé soluziuns adatades por caji singui. Al ó dí avëi tres amënt le bëgn dla coletivité y se damané tres ci che é de vantaje por la sozieté. „N ejëmpl tlassich de chësc vers é le Pat de garanzia firmé cun le Govern, che scona l’autonomia da intervënc unilaterai dl Stat por ressané le debit publich."
Imajes conferënza stampa Kompatscher https://we.tl/EWN0RoYt8w
Intervistes Kompatscher
https://we.tl/Yqf8sGbvWA
https://we.tl/5XmBGCCgfl
https://we.tl/4ia1PEr6mW
File audio MP3 https://we.tl/yPSQVyBp4i
rc
Galaria dales fotografies
