Atualità
Strades y mobilité tl raiun Salten-Scilier: Mussner incunta i ombolc
Sön i proiec ti seturs dla mobilité y dla rëi stradala á rajoné da püch l’assessur Florian Mussner cun i ombolc dla comunité comprensoriala Salten-Scilier.
L’assessur por la rëi stradala y la mobilité Florian Mussner á sotligné l’importanza da lauré adöm ai Comuns por realisé i proiec che reverda i seturs dl sorvisc strades, dla viabilité y dla mobilité publica. „Dantadöt él insciö poscibl da organisé i laurs adöm ai Comuns te na manira da conscidré deplü les esigënzes di zitadins s’anuzan dles sinergies y cun n sparagn di cosć“, á dit Mussner. Por chësc ann él a desposiziun por la Repartiziun Infrastrotöres indöt 90 miliuns de euro, por le Sorvisc Strades 49 miliuns y por la Mobilité indöt 202 miliuns. „Chëstes ressurses gnará investides sön döt le raiun provinzial aladô de na lista de priorités tlera cun l’obietif da aumenté la segurëza sön strada, da avëi punc y tuní ressaná y n sistem dl trasport publich a bunmarcé y atratif por i zitadins“, insciö Mussner.
De plü ince i intervënc preodüs te Gherdëna
Laurs da asfalté é sön le program prësc te vigni Comun dla Comunité comprensoriala, á splighé le diretur dla Repartiziun Sorvisc Strades Philipp Sicher. N implant d’ilominaziun nü é preodü al intern dl tunel tl Comun de Urtijëi. Por ci che reverda le program dala Repartiziun Infrastrotöres vëgn i laurs efetuá aladô de na lista plurianuala y che reverda intervënc söi punc y por mët en segurëza les strades dala tomada de peres o da roes. Un di laurs preodüs chiló é la metüda en segurëza dla strada statala de Plan de Gralba tl Comun de Sëlva. La colaboraziun danter i Comuns y la Repartiziun Mobilité reverda dantadöt l’elaboraziun de architades y di orars dles corieres y ferates cun ince l’elaboraziun de conzec de mobilité adatá ales esigënzes locales. Les plü gran novités por inann é le passaje de corieres vigni ora d’isté söi Jus dolomitics (madër nia de domënia) y ince le passaje dles corieres vigni ora danter Dantercëpies y Col Raiser.
I ombolc á porté dant tratan l’incuntada de plü consëis y idees por proiec ti proscims agn. Le diretur de Departimënt Valentino Paganí á recordé che la Provinzia á cumpré de plü radars por auemnté la segurëza stradala che gnará adorades te döte le raiun provinzial dantadöt sön les trates plü adorades y cun na prozentuala de inzidënc alta.
rc
Galaria dales fotografies
