Atualità
Dala Junta: Ferata dla Venosta, 13,6 miliuns por l’eletrificaziun
Löm vërda dala Junta provinziala al finanziamënt de 13,6 miliuns (2016-19) por l’eletrificaziun dla linia feroviara dla Val Venosta.
Passaje dles ferates vigni mes’ora, plü lerch por i anuzadus y ferates diretes cina Balsan é les priorités plü importantes por ci che reverda la realisaziun dl proiet de eletrificaziun dla linia dla ferata dla Val Venosta danter Maran y Mals. Sön proposta dl assessur por la mobilité Florian Mussner á la Junta provinziala dé incö, ai 11 de lugio, süa aprovaziun al finanziamënt di laurs nezesciars dal 2016 y 2019 cun n import de 13,6 miliuns de euro. Por inann é la soma a desposiziun de 3,9 miliuns de euro cun chi che la STA (Strotöres Trasport Südtirol) podará efetué i laurs plü importanc.
Sön le program él danterlater l’adatamënt dles scines, la realisaziun de sotpassaji pro n valgönes staziuns por ti consintí ales ferates FLIRT plü granes da passé, l’istalaziun de 1.500 pilastri por la linia dl strom y ince la normaziun dles scines. Lapró röiel ince na seria de laurs tecnics sciöche por ejëmpl pro les incrujades, por i sistems de segnalaziun y dl strom che vigni ferata mëss spo avëi. Por düc i laurs sön les ferates y sön la linia dla Val Venosta, che reverda ince l’istalaziun dl sistem de segnalaziun europeich y le potenziamënt a 25 kilovolt él preodü n investimënt de presciapüch 66,5 miliuns de euro, 17,9 de chisc é bele gnü aprová dala Junta danter 2015 y 2016.
„Al se trata de n proiet fondamental por le svilup dl trasport local sön les scines y cun le potenziamënt dla linia sarál poscibl tl dagní da avëi ferates plü granes, coliamënc vigni mes’ora danter Balsan y Mals y cun prospetives nöies por la mobilité sön les scines“, spliga l’assessur por la mobilité Florian Mussner. Implü é l’eletrificaziun ince n alisiraziun por l’ambiënt, deache al podará insciö gní sparagné indöt 4,2 miliuns de chili de CO2 al ann en confrunt al’adoranza atuala dl diesel sciöche forza motorica.
rc
