Atualità
Dala Junta: Sorvisc strades, 3,7 miliuns por le barat di mesi
I mesi stradai dl Sorvisc strades gnará barata fora cun veicui moderns y efiziënc. La Junta á aprové incö n investimënt de 3,7 miliuns de euro.
I mesi stradai dl Sorvisc strades dla Provinzia vëgn renová te na manira costanta ince por avëi a desposiziun veicui tres plü efiziënc y moderns. Incö (ai 12 de lugio) á la Junta provinziala dé süa aprovaziun ala deliberaziun proponüda dal assessur Florian Mussner che reverda n investimënt de indöt 3,7 miliuns de euro.
Do i 3,7 miliuns de euro metüs a desposiziun tl 2015 ciafa le Sorvisc strades dla Provinzia inann na secunda pert de finanziamënc dla medema soma por jí inant cun l’operaziun de renovamënt y modernisaziun di mesi stradai por efetué i laurs nezesciars sön strada. La delibera é gnüda aprovada incö dala Junta provinziala sön proposta dl assessur por la rëi stradala Florian Mussner che á sotligné che „nosc obietif ne é nia ma chël da renové i veicui a desposiziun por baraté fora i mesi bele inant cun l’eté, mo ince da cumpré tl dagní ma plü veicui cun n’emisciun dër vasa por contribuí insciö ala sconanza dl ambiënt“.
Cun i fonds a desposiziun gnarál baraté ite indöt 50 mesi cun 48 de nüs: cun i veicui cumprá tl 2015 barata fora le Sorvisc strades indöt 108 mesi cun indöt 96 veicui nüs. „Al se trata de n barat nezesciar, ince deache tröc di mesi á bele arjunt plü co 15 agn de vita y i cosć de mantignimënt é tres plü alc. Implü él da conscidré che la cumpra de veicui nüs porta ince para a vantaji por l’ambiënt, deache i mesi atuai é danter les tlasses Euro 0 y Euro 3 y i mesi nüs sará Euro 6“, insciö Mussner. Les mascines nöies dl Sorvisc Strades gnará cumprades tres bandides spezifiches. Le numer di mesi en relaziun ai chilometri é presciapüch le medemo en confrunt ai raiuns vijins dl Tirol y dl Trentin. Da segnalé él ince che tl dagní se fistidiará n veicui dl Sorvisc Strades de na trata de indöt 12 chilometri en confrunt ai 11 chilometri atuai.
rc
