Atualità
Dala Junta: Manutenziun dles strades, aprové le program integratif
La Junta provinziala á aprové incö n program integratif 2016 por ci che reverda i intervënc de manutenziun straordinara dles strades por indöt 4 miliuns d'euro.
De indöt 1,9 miliuns de euro é le program de mosöres ajuntives por les strades provinziales y de 2,1 miliuns de euro le program che reverda les strades statales. Trami dui i program é gnüs aprová incö, ai 12 de lugio, dala Junta provinziala sön proposta dl assessur por la mobilité Florian Mussner cun n investimënt complessif de indöt 4 miliuns de euro. „Na rëi dla strada mantignida bun ne garantësc nia ma ai zitadins na mobilité efiziënta, mo ti pormët ince ales porsones che laora tl’economia y tl turism, ai ghesć y a chi dla roda da së möi saurí“, á sotligné l’assessur competënt por la rëi stradala. Al pröm post pro la manutenziun resta inant la proteziun y la sconanza dles porsones sön strada, dai peduns, ai ziclisć, motoziclisć y autisć, insciö Mussner.
Les mosöres reverda danterlater laurs por aumenté la segurëza, por ci che reverda l’asfalt, i mürs y i tlandri, sciöche ince la metüda en segurëza di 1.662 punc (cun 200mile euro), y di 206 tuní (cun 50mile euro a desposiziun). Dötadöm é la rëi stradala che vëgn manajada dala Provinzia lungia 2826 chilometri.
rc
