Atualità
Dala Junta: cin’ reparc de nasciüda, ala fin d’otober stlüj Sterzing
Tl Südtirol gnarál mantigní cinch reparc de nasciüda söl teritore, ala fin d’otober gnarál stlüt Sterzing. Chësta dezijiun é gnüda tuta dala Junta.
Al toma ai 29 de lugio le termo cina chël che la Provinzia de Balsan messará ti invié a Roma n proiet che reverda i reparc de nasciüda, y incö (ai 12 de lugio) á la Junta tut na dezijiun te chësc setur. Por fá chësc á la Junta provinziala inciarié n comité por l’assistënza dla nasciüda che á analisé la situaziun di reparc de neonatologia di set ospedai südtirolej che á definí ince les döes priorités nezesciares: garantí la segurëza y la sanité dles umes y di viadus. Y chësc é ma meso sce al vëgn tigní ite i standarg de cualité preodüs dal 2010 inant dala Conferënza Stat-Regiuns che stabilësc na presënza ativa, 24 ores sön 24, 365 dis al ann, de n’efon, n ginecologh, n’anestesista y n pediater.
„Chësc arat tecnich é la pert fondamentala dla deliberaziun dla Junta da incö, che conscidrëia ince n’atra valutaziun importanta fata dal comité. Al se trata dla valutaziun che reverda la destanza dal repart de nasciüda che ne tëgn nia ite le numer dles 500 nasciüdes al ann al proscim ospedal plü gran y che é le criter che definësc la condiziun por l’indicaziun de n raiun rural“, á splighé le presidënt Kompatscher. Cun tl zënter chëstes conscidraziuns á la Junta provinziala tut la dezijiun da mantigní inant cinch reparc de nasciüda söl teritore (en confrunt di trëi tl Trentin). Insciö gnarál damané a Roma l’aplicaziun de na deroga por i reparc de Bornech, Porsenú, Balsan, Maran y Schlanders.
Le repart de nasciüda de Sterzing gnará indere stlüt cun la fin d’otober y propi te chëstes ores é l’assessuria por la sanité Martha Stocker en contat cun i suranstanc dla strotöra por splighé la situaziun. „Mo le ospedal de Sterzing ne é nia en prigo, ince conscidran che nia ma le repart de ortopedia é gnü amplié, mo al é ince gnü ciafé na soluziun por le mantignimënt dl repart de neuroreabilitaziun, cun n ampliamënt ince di lec. Zënza desmentié che la stlüta dl repart de nasciüda reverda ma na pert dl setur de ginecologia che restará por la gran pert davert“; insciö Kompatscher.
Le grup de laur portará a piz so laur de analisa ai 30 de setëmber cun la presentaziun dles diretives por ci che reverda les prestaziuns sanitares che messará gní tignides ite da düc i ospedai tratan la fasa de nasciüda mo ince do la nasciüda. „Nosc obietif prinzipal é chël da garantí n svilup sostenibl dl sistem sanitar südtirolej cun sorvisc de cualité alc y la segurëza di raporc de laur. I ún tut chësta dezijiun cun l’obietif da sconé la sanité y la segurëza di paziënc.“
rc
