Atualità
Dala Junta: unité nöia por l’archirida tlinica y d’assistënza sanitara
La Junta provinziala á aprové incö l’istituziun de öna na unité organisativa nöia por l’archirida tlinica y d’assistënza sanitara tl Südtirol.
Cun l’obietif da garantí n aumënt cualitatif tl’assistënza ai paziënc á la Junta provinziala tut la dezijiun da sostigní le potenziamënt dl’ativité de archirida dl’Aziënda sanitara tl Südtirol. Insciö á la Junta provinziala aprové incö (ai 19 de lugio) l’istituziun de n’unité d’organisaziun spezifica por l’archirida tlinica y d’assistënza sanitara.
I compic dl’archirida d’assistënza sanitara ne reverda nia ma la planificaziun, l’organisaziun y la regolamentaziun mo ince la valutaziun y l’otimisaziun dl’assistënza sanitara por la popolaziun. „Chësta dezijiun dess ince ester na sbürla por motivé de plü doturs jogn südtirolej da gní zoruch tla Provinzia“, sotlignëia l’assessuria provinziala por la sanité Martha Stocker. Chësta mosöra ajuntiva é interessanta dantadöt por profescionisć che á l’intenziun da colié le laur da dotur cun l’ativité d’inrescida.
L’unité d’organisaziun nöia ará le compit da promöie y coordiné l’archirida tlinica y d’assistënza sanitara de döta l’Aziënda sanitara y da armonisé ince i proiec d’inrescida bele scomenciá. Un di obietifs de chësta unité nöia sará ince la colaboraziun cun la scora profescionala de sanité Claudiana por renforzé le lian danter l’archirida y l’inovaziun. I posć nezesciars por l’unité d’organisaziun nöia gnará metüs a desposiziun tres la planta organica a desposiziun.
rc
