Atualità
Dala Junta: regolamënt nü por les arees de sojornanza por camper
Cun mudaziuns ales normes di eserzizi publics á la Junta provinziala aprové incö n regolamënt por ci che reverda l’eserzize de arees de sojornanza por camper.
La regolamentaziun provinziala nöia sön les arees de sojornanza por i camper á l’obietif da evité i caji de maladoranza y de concorënza nia valia danter i afitadus dles sperses. „En colaboraziun cun l’Assoziaziun di gesturs dles arees de afit VCS él sté meso da ciafé n’acordanza por regolamenté plü avisa chësc setur turistich“, á sotligné le presidënt dla Provinzia Arno Kompatscher do la sentada dla Junta.
Les arees de sojornanza por i camper é definides sciöche eserzizi de rezeziun alaleria y pó ester arees da parchené publiches o davertes al publich. Ares é ma ametüdes sce ares respetëia les prescriziuns ti seturs dl’urbanistica, dl frabiché, dla netijia publica, dla sconanza dl ambiënt, dla segurëza y dla prevenziun di medefüc.
Cun le regolamënt nü aprové dala Junta é les arees de sojornanza di camper gnüdes identificades tl PUC sön la basa dla regolamentaziun urbanistica dles plazes da parchené publiches. Le Comun pó manajé diretamënter chëstes zones y ti les surandé a privac, che pó ince realisé arees nöies te zones urbanistiches olache al é preodü ince ativités dl setur terziar.
La Junta á implü definí le numer di mesi ametüs y la dorada dla sojornanza: tles arees publiches o davertes al publich é la sojornanza aprovada por manco de 20 camper por n mascimo de 72 ores. Do na palsa de sura 72 ores mëss le camper lascé la plaza da parchené y i proprietars dl camper pó s’anuzé indô dla medema plaza impormó do da trëi dis. Le regolamënt stabilësc implü ince les atrezadöres nezesciares por les zones da parchené. Tl 2015 él sté indöt 305mile i camper che s’á archité tl Südtirol pro almanco öna na nöt, por n numer de 1,4 miliuns de pernotamënc tles 48 zones dl camper te Südtirol cun 4.549 plazes singules por lascé jö le camper.
rc
