Atualità
Dui miliuns de euro por la cura dl paesaje
Les domandes de contribut por mosöres de cura dl paesaje é stades tl 2016 indöt sura 600: la Junta provinziala á metü a desposiziun 2 miliuns de euro.
I contribuc dla Provinzia por intervënc de mantignimënt y cura dl paesaje por l’ann 2016 á na soma totala de 2 miliuns de euro. Les domandes é stades indöt sura 600. „Dal punt de odüda turistich, cultural y dl paesaje é chësc n segnal important por ci che reverda la proteziun dl paesaje cultural local“, sotlignëia l’assessur provinzial por l’ambiënt Richard Theiner. Cun chëstes ressurses economiches él meso da finanzié la cura dl paesaje te zones sot a sconanza y ince te raiuns nia sot a sconanza che reverda danter l’ater la realisaziun y manutenziun de mürs a sëch, de tëc cun scianores, sis de lëgn, pici monumënc culturai rurai y sëmenes por escursciuns.
Dötadöm él a desposiziun 353mile euro por la cura dl paesaje al intern di set parcs naturai provinziai y 1,5 miliuns de euro tles arees aldinfora di parc, sciöche al spliga le diretur dl Ofize aministratif Paesaje y svilup dl teritore Horand Maier. Por la cura dl paesaje dla pert südtiroleja dl parch nazional dl Stelvio á la Junta provinziala aprové indöt 204mile euro, de chisc ti é 129mile euro gnüs assegná al Comun de Martell. Cun indöt 16mile euro vëgnel implü sostigní le ressanamënt de na sëmena de valüta storich-culturala tl parch natural Trëi Pizes de Lorëi. Les domandes de contribut por la cura dl paesaje vëgn manajades dala Repartiziun provinziala Natöra, paesaje y svilup dl teritore en colaboraziun cun l’organisaziun dl Heimatpflegeverband Südtirol.
rc
