Atualità
Al laur cun la roda, i partezipanc é stá plü de mile
Trëi iadi tan tröpes co l’ann passé é stades les porsones che á tut pert inann ala campagna „Al laur cun la roda“, scomenciadia de „Südtirol pedalëia“.
Ince sce la plöia é stada tröpa y les temperatöres cialdines tles ultimes edemes él impó sté tröc zitadins che á tut pert tl mëis de lugio ala scomenciadia „Al laur cun la roda“ organisada dala STA (Strotöres trasport Südtirol) adöm cun l’Ökoistitut. Indöt é stá i partezipanc dl proiet che fej pert dla seria de scomenciadies dl setur "Green mobility" dla Junta provinziala avisa 1.012. I ziclisć, che á fat le percurs danter ciasa y le post de laur cun la roda, ne á insciö nia ma porté pro a favorí le bëgnester personal, mo á ince contribuí a sconé l’ambiënt, dantadöt tles vijinanzes y al intern dles cités dla Provinzia. „N stüde realisé a Copenhagen dij che por vigni chilometer fat cun la roda porta 0,22 euro de davagn ala sozieté cun efec positifs sön la sanité y l’ambiënt. Fat cun l’auto porta le medemo percurs a conseguënzes negatives por 0,75 euro por chilometer“, spliga le coordinadú dl setur Green mobility Harald Reiterer. N vantaje é ince che les strades pó gní adorades cun les rodes te na manira plü efiziënta y chësta é insciö na rajiun implü por lascé l’auto a ciasa, prezisëia Reiterer.
Le concurs „Al laur cun la roda“ á sciöche obietif chël da amplié la mobilité sostenibla cun mosöres concretes por svilupé le Südtirol tres deplü te na regiun model por ci che reverda la mobilité „vërda“. „Un di obietifs prinzipai dla Junta provinziala é chël da fá aldinfora dl Südtirol n’ejëmpl de na regiun alpina cun na mobilité sostenibla che scona l’ambiënt y cun na cualité de vita alta por i zitadins“, sotlignëia l’assessur por la mobilité Florian Mussner. La campagna „Al laur cun la roda“ s’é stlüta jö cun le mëis de lugio, le concurs „Südtirol pedalëia“ vá ciamó inant cina ai 18 de setëmber. Por informaziuns plü monüdes prëibel consulté le sît www.altoadigepedala.bz.it.
rc
