Atualità
Confrunt danter le marcé dl laur südtirolej y chël europeich
La tematica prinzipala dl’ediziun nöia de „Arbeitsmarkt news“ é i indicadus prinzipai dl marcé dl laur südtirolej tl contest europeich.
La prozentuala de ocupaziun é stada tla Provinza de Südtirol tl 2015 dl 76,7 porcënt por ci che reverda la popolaziun danter i 20 y i 64 agn d’eté, n valur che da cater agn resta söporjö tres anfat. L’obietif dl 75 porcënt sciöche obietif da arjunje da döt le teritore europeich, che dess gní arjunt cina l’ann 2020, é bele gnü arjunt tl Südtirol dal 2008 inant. Le proscim travert é insciö gnü stabilí dala Junta provinziala por le 2020 cun na prozentuala dl 80 porcënt de porsones danter i 20 y i 64 agn che dess avëi n’ocupaziun.
Le diretur dla Repartiziun Laur, Helmuth Sinn, recorda che „la mudaziun plü grana é gnüda a se le dé pro n aumënt dër alt dl numer de seniors che laora ciamó, indere é l’ocupaziun jonila jüda en pü’ zoruch.“ Cun le valur de 76,7 porcënt de porsones cun n laur por ci che reverda la popolaziun danter i 20 y i 64 agn é le Südtirol ti pröms posć a livel europeich, ince sce cun n valur plü bas dles regiuns vijines. La prozentuala de dejocupaziun é stada tl 2015 te Südtirol dl 3,8 porcënt cun 0,3 punc plü basa co tl 2012. Ince en general é la prozentuala de dejocupaziun jüda zoruch te döta l’Europa y chësc é n segnal che le marcé dl laur europeich é bel plan te na fasa de mioramënt. Tl Tirol é la dejocupaziun dl 3 porcënt, tla Svizera orientala é le valur anfat sciöche tl Südtirol, tl Trentin é le valur dl 6,8 porcënt.
rc
