Atualità
Dala Junta: assistënza dl’infanzia, tarifes uniches y oferta plü ampla
Löm vërda dla Junta provinziala al sistem de finanziamënt nü por i sorvisc d’assistënza ala pröma infanzia. Tarifes plü valies y n’oferta plü ampla.
Sön proposta dl’assessuria Waltraud Deeg á la Junta provinziala aprové incö (ai 09 de jená) le model de finanziamënt nü por l’assistënza ala pröma infanzia che sará operatif cun le scomenciamënt al 1 de jená dl 2017 inant y che sará na sauridanza por döt le sistem. La novité plü importanta é che, por le pröm iade, düc i sorvisc sará co-finanziá dala Provinzia, dai Comuns y dales families. „Cun chësc passaje sarál poscibl da garantí n’oferta valia y plü ampla sön döt le teritore, cun vantaji dantadöt por les families che porta para n’assitënza plü ampla y cun na mioraziun tla cualité“, á splighé l’assessuria por les families Waltraud Deeg incö. „Le model de finanziamënt nü é gnü aprové do na seria de incuntades adöm al Consorz di Comuns y cun dötes les perts interessades y che prô da tigní cunt dles ghiranzes fates dales families y dales organisaziuns“, insciö Deeg.
Por ci che reverda les mudaziuns spezifiches messará les families che lascia i mituns a un di sorvisc d’assistënza tratan la pröma infanzia paié inant na pausciala calcolada sön la basa dla situaziun economica aladô dla detlaraziun unica dl davagn y dl patrimone (DURP). Implü sará i criters de conzesciun de contribuc i medemi por ci che reverda les micro-strotöres y les Umes dl de. Damané do contribuc podará düc i geniturs cun mituns y/o mitans dai 3 mëisc ai 3 agn che ne vá nia ciamó ala scolina. Le sorvisc dles umes dl de podará ince gní anuzé dai mituns cun n’eté prescolara: te chisc cají messará i geniturs paié döta la spëisa. Por ci che reverda les Umes dl de él la Provinzia che cofinanziëia chësc sorvisc cun i cosć che s’á arbassé por i geniturs de söporjö le 50 porcënt. „Chësta novité é gnüda tuta sö dër positivamënter – á ajunté l’assessuria Deeg – cun les tarifes plü bases y plü altes dles ores che resta les medemes y che sará dai 0,9 ai 3,65 euro.“
Le sistem nü ti dá ince plü responsabilité ai Comuns, sciöche bele preodü dala lege sön la familia aprovada dal Consëi provinzial tl 2013. „L’obietif é chël da socodí les ghiranzes dles families por vigni comun y por rové a chësc gnarál stabilí na basa minima de posć por Comun dal 2017 inant“, insciö Deeg. Cun le 2017 messará insciö vigni Comun mët a desposiziun posć por almanco le 15 porcënt di mituns residënc danter i 0 y i 3 agn. „Chësta dezijiun é n vare important por fá funzioné damí la relaziun danter le laur y la familia sides tles cités co ince ti raiuns da munt“, á comenté l’assessuria por les families. N’atra novité por garantí la continuité didatica y la segurëza tla planificaziun é ince na dorada minima de almanco 12 ores de assistënza edemala por vigni möt y möta.
rc
Galaria dales fotografies
