Atualità
L ncrëusc a San Ciascian devënta plu segur – CUN FOTOS
OSP – L assessëur ai lëures publics Florian Mussner ti a sëurandat n lunesc ai prim de setëmber i lëures per l ncrëusc danter la streda de zicunvalazion y la stredes de azes a San Ciascian ala firma Schiavo. L ncrëusc nuef dëssa unì fat te set mënsc y custerà 568.697 Euro.
Prësc uniral metù man cun i lëures pra l ncrëusc danter la streda de zircunvalazion y la stredes de azes a San Ciascian danter l chilometer 2,85 y 3,55. N lunesc ai prim de setëmber ti à l assessëur ai lëurs publics sëurandat i lëures ala firma Schiavo. „Sën possen finalmënter ti ji permez ai lëures per ressolver i promlems de viabltà te chësc raion“ dij Mussner cun legrëza. „l ncrëusc nuef dëssa deventé saurì da nuzé y dantaldut plu segur per chëi che se muef sun streda“ à sorissà l assëssëur ai lëures publics. L ie udu dant de fé doi rundeles danter l ntreda dl luech y l magasin di destudafuech cun n diameter de 30 metri. L muvimënt pra l ntreda a San Ciascian dëssa uni miurà tres chësta rundeles y i mesuns de trasport dëssa nsci furné plu bel plan. L assessëur Mussner à rengrazià i patrons di grunc che à messe dunfrì si pec de grunt, per si unì ncontra y culaburazion. La firma Schiavo de Sterzing fajerà l ncrëusc y la stredes de azes. L ncrëusc cun la doi rundeles unirà a custé 568.697 Euro. Tes n lascé do dl priësc de 5,7 % ie unida arjonta la ncëria. L ncrëusc dëssa unì fat te n tëmp de set mënsc – tla sajon turistica uniral fat na paussa. Pra la sëurandata di lëures fova nce presënc l ambolt Ugo Dorigo y l assessëur per lëurs publics de chemun Paul Rudiferia, deberieda cun i esperc respunsabli schiche l diretëur de dipartimënt Ing. Marco Massella, l diretëur de ripartiziun Ing. Italo Furlan cun i culaburadëures Ing. Gustav Mischi y Geom. Pinzan, che sarà i respunsabli per la realisazion de chësc lëur. Ai pirm de setëmber fova nce presënt l proietant Dr. Ing. Carlo Corona de Maran.OSP
