Atualità
Dala Junta: Finanzié le program anual dl’Agenzia por l’energia
La Junta provinziala á aprové le finanziamënt dl program anual dl’Agenzia por l’energia Südtirol.
“Cun l’istituziun dl Agenzia por l’energia tl 2014 él gnü amplié les competënzes y les ativités dl’Agenzia CiasaClima por arjunje l’obietif dl plann Energia Südtirol 2050”, sotlignëia l’assessur provinzial Richard Theiner. Incö á la Junta provinziala aprové le program anual dl’Agenzia por l’Energia dl Südtirol y le finanziamënt che alda lapró de 750mile euro. Öna dles novités é l’assunziun da pert dl’Agenzia di cosć d afit dla sënta, che la Provinzia paiâ cina sëgn.
Le program ComunClima acompagnëia i Comuns tl’elaboraziun y tl’implementaziun de n plann por l’adoranza sostenibla dl’enegria y por le clima. Le mosöres é de plü: mioramënt dl consum energetich y idrich di frabicac y di implanc comunai, la produziun de energia a livel local, la mobilité sostenibla y la gestiun dl refodam. Chësc proiet é insciö n stromënt concret por la realisaziun de na sozieté plü acorta al’adoranza dles ressurses energetiches. Cun l’Energy Report Online vëgnel implü metü a desposiziun di Comuns n stromënt che consënt la registraziun anuala di consums energetics de düc i frabicac y implanc publics.
Tl program anual nü él ince n’atra novité: l’Energy Check, na scomenciada che á l’obietif da individué le potenzial de sparagn y dla reduziun de emisciuns di frabicac. Le pröm vare sará n’analisa te na forma independënta. “Implü él ince gnü elaboré tres l’Energy Check n program de consulënza cun mosöres desvalies”, sciöche al spliga le diretur Ulrich Santa. Tratan i suralüsc gnarál insciö analisé, danter l'ater, te na manira sistematica les finestres, i parëis y le scialdamënt cun n contribut da paié de 75 euro. Tratan la consulënza gnarál ince debatü les mosöres de ressanamënt y de sparagn poscibles. Implü laora l’Agenzia a n proiet “Clima factory” de relevamënt dl potenzial de sparagn d’energia y de sconanza dl ambiënt dles piceres impreses y chëres mesanes. “Dötes les scomenciadies rapresentëia de plü vari importanc tl vers dl’atuaziun dl Plann Clima”, dij Theiner.
rc
