Atualità
De dl’Autonomia: plata internet ajornada
La plata internet nöia en gaujiun dl De dl’Autonomia é online cun informaziuns sön la storia y les dates dles manifestaziuns de cornisc.
Por le Südtirol é la data de ai 5 de setëmber na data storica. Tl ann 1946 êl gnü sotescrit a Paris l’Acordanza Gruber-Degasperi, na sort de Magna Charta dl’Autonomia. Inann él insciö passé 70 agn dala firma storica danter le Minister por i afars esters Karl Gruber y le pröm minister dla Talia Alcide Degasperi. L’Acordanza de Paris é öna dles fontanes iuridiches prinzipales por le svilup dl’autonomia südtiroleja che é aldedaincö n ejëmpl a livel mondial por na soluziun pazifica de conflic etnics.
Chësc ann vëgn l’aniversar di 70 agn festejé cun n convëgn storich sön Sigmundskron y por l’ocajiun él ince gnü publiché na plata internet aposta (http://www.provinzia.bz.it/de-autonomia/) cun informaziuns generales sön l’autonomia y le program dles manifestaziuns. Por talian y todësch él ince poscibl da inrescí les conescënzes storiches y atuales tres n quiz sön la plata Facebook dla Provinzia de Balsan.
La plata web dedicada al De dl’Autonomia, elaborada dal Ofize stampa dla Provinzia en colaboraziun cun l’Informatica Südtirol, pita na panormanica sön les manifestaziuns dedicades aposta al aniversar y tla seziun autonomia él da ciafé na seria de informaziuns de basa sön le percurs storich dala firma tl ann 1946 cina aldedaincö. A desposziun él ince la revista speziala dl „Land Südtirol“ che ti é propi gnü dedicada ai 70 agn dl’Acordanza de Paris.
rc
