Atualità
Tòch de strada Punt de Fer devënta plü sigü
OSP - Le punt prigorus y strënt tl raiun de Punt de Fer dan Pedraces ne esistarà nia plü di. Te chësta zona passarà la strada provinziala fora por n tunel tl crëp y spo sura n punt nü fora. En lönesc, ai 1 de setëmber à l´Assessur ai laûrs publics Florian Mussner presentè le proiet da 8,4 miliuns de euro a Pedraces.
La varianta dla strada mët man zirca 2,4 km a nord dla localité de Pedraces. La strada condüj tres n tunel de 422 metri y passa spo sura la Gran Ega sön n punt a dui ćiamps tignì sö da três d´acià de na lunghëza de 57,7 metri tres la strada esistënta y se colian spo ala pröma ota cun la strada provinziala esistënta. “Le tunel y le punt nü dess smendrì la zona de prigo” dij l´Assessur Mussner. Implü à le punt vedl bele da n pez debojëgn de gnì ressanè.
Aladô de sües informaziuns vëgn i laûrs a costè 8,4 miliuns de euro. “Al é scioldi che vëgn dà fora por na cossa importanta, por la segurëza di zitadins” spliga l´Assessur ai laûrs publics Mussner. “Döta la strada dla Val Badia mëss gnì ressanada, nia ma le trat inizial a scomenciamënt dla valada” arata l´Assessur.
Sön la trassa nöia él preodü döes corsies de 3,5 metri de lunghëza l’üna cun dui banć renforzà de mez meter l´un. La larghëza dla strada fej fora insciö te döt le tòch ot metri cun eventuai ampliamënć tles otes. Tl tunel y söl punt déssel implü gnì fat sö marciapîsc de feter n meter.
“Deache intratan la costruziun dl tunel mo inće tratan düć i laûrs sön chësc tòch messaràl gnì garantì la zircolaziun dl trafich jaràl debojëgn d´amplié la strada suradöt pro le portal a nord” dij Mussner. I tecnics responsabili lascia al savëi che chësc é poscibl zënza de gran problems fajan sö n mür de sostëgn a val.
La drenaja dla strada é garantida da na pendënza significativa sides dl lunch che de travers. Ales entrades dl tunel, tl tunel y sön le punt sura la Gran Ega él odü danfora pozëć stradai cun laprò n sistem de canalisaziun por n deflus regolar dles eghes dal crëp y dala suraspersa. Chësc è le post olache plüdadî gnôl deponü le refodam, mo che à oramai ciafè na desćiaria do norma sön Col Maladët.
OSP
