Atualità
Dala Junta: De dl’Autonomia cun Gentiloni y Kurz
De plü manifestaziuns por le De dl’autonomia en gaujiun di 70 agn dal’Acordanza de Paris. Cun n convëgn ai 5 de setëmber cun i Ministri Gentiloni y Kurz.
Dai 5 de setëmber dl 1946 cina ai 5 de setëmber dl 2016. L’Acordanza de Paris, la Magna Charta dl’autonomia, festejëia i 70 agn y por recordé chësc avenimënt particolar organisëia la Provinzia n convëgn a Sigmundskron, un di posć plü importanc dla storia contemporanea dl Südtirol. Cater sará i intervënc tratan le danmisdé da pert de esperc de storia (Eva Pfanzelter, Andrea Di Michele, Michael Gehler y Rolf Steininger) che presentará na panoramica söi agn dal 1946 inant cun le scomenciamënt dal’Acordanza de Paris ai dui Statuc d’Autonomia che á porté a na soluziun pazifica di conflic danter grups de lingaz desvalies. I laurs dl convëgn gnará dauris dal presidënt dla Provinzia Arno Kompatscher
en lönesc, ai 5 de setëmber dl 2016,
dales 10.00
tl salf di Ciavaliers
a Sigmundskron.
Le convëgn jará spo inant domisdé cun la partezipaziun di dui Ministri por i afars esters de Talia y Austria, Paolo Gentiloni y Sebastian Kurz. Do n’introduziun da pert dl presidënt dla Provinzia fajará Gentiloni so discurs dales 15.00, le minister Kurz spo dales 15.15. Do le convëgn incuntará Kompatscher, Kurz y Gentiloni i jornalisć por na detlaraziun ala stampa. I media che ó ester presënc al evënt dess prëibel scrí fora y mené derevers le documënt che é gnü injunté a chësc comunicat.
Na pröma zelebraziun por le De dl’Autonomia gnará bele a se le dé chësta sabeda sön Ciastel Tirol dlungia Maran: söporjö 15 agn do l’inauguraziun dl Museum storich-cultural de Ciastel Tirol é la seziun dl museum che reverda la storia contemporanea gnüda ajornada. Dla pert artistica s’á fistidié Carmen Müller, la revijiun di contignüs é gnüda fata dales curadësses Petra Paolazzi, Veronika Tauber y Esther Pirchner cun la suravijiun di storics Hans Heiss y Giorgio Mezzalira. Propi tl contest dl aniversar di 70 agn dal’acordanza Gruber-Degasperi vëgn la mostra „Le Südtirol y le XX secul“ daurida dal Presidënt dla Provinzia Arno Kompatscher y dal assessur Florian Mussner
en sabeda, ai 3 de setëmber dl 2016,
dales 11.00
tl salf di Ciavaliers
a Ciastel Tirol.
Le pröm de dla daurida dla mostra él ince le De dla Porta daverta cun entrada debann al museum dales 10.00 ales 17.00 y ala mostra spo dales 12.30 inant.
rc
