Atualità
Operes d’ert pra la fiera UNIKA te Gherdëina
OSP – I unicac fai tl lën dla nona fiera dla scultura “Unika” a Runcadic ie da udëi da n juebia ai 4 de setëmber dala 18.00 inant canche l unirà tenì la giaurida cun la presënza dl presidënt Luis Durnwalder, l assessëur per l artejanat Werner Frick y i rapresentanc di artejans. Feter 30 artisc mët ora si lëures fai esclusivamënter a man, che sarà da udëi nchin a n dumënia 7 de setëmber tl zënter dal tennis trasfurmà te na berstot d’ert.
“La fiera dla scultura Unika te Gherdëina ie l spiedl dla forza creativa di scultëures gardeneres, che ora de n toch de lën fej operes d’ert uniches sun dut l mond”, dij l assessëur Werner Frick che sustën la manifestazion tres l assessorat per l artejanat, nsci sciche l fej la lia provinziela per l artejanat LVH y i chemuns de Gherdëina. I vijitadëures giapa da udëi y da cumpré lëures ziplei esclusivamënter a man y unicac dala bola „Entirely Hand Carved“. L vën metù ora ert tradiziunela sacrela y nce scultures modernes di artisc de Gherdëina. Mplu uniral n sada ai 6 de setëmber dala 18.00 tenì na cunferënza cun l professëur Edgar Moroder sun l scultëur Batista Moroder Lusenberger che ie stat un di prim artisc´ che à caraterisà la scultura de Gherdëina. Ntan i dis dl'Unika iel nce sun l program l'enes dl ert y dl maië bon, che vën metudes a ji n culaburazion cun la gastronomia tla valeda. Te na mostra speziela iel pona da udëi modiei y dessenies de scultures particuleres che ie ududes dant te sales, stues y ufizes sun dut l mond. La nona fiera dla scultura de Gherdëina vën tenida dal 5 al 7 de setëmber 2003 dala 10 danmesdi nchin ala 7 da sëira tl zënter dal tennis de Urtijëi a Runcadic.OSP
