Atualità
Di de giauria per l ann de scola tla Ladinia
OSP - Cun l Di dla Scola Ladina a S.Lenert de Badia à n vënderdi, 5 de setëmber metù man l ann de scola nuef per respunsabli, nsenianc, y culaburadëures dla scoles ladines. L assessëur per la scola y cultura ladina Florian Mussner à purtà dant nuviteies tl ciamp dla scola, ti à dat esprescion ala stima per l lëur di culaburadëures tla scola y ti mbincian truepa forzes per l ann nuef. Do la rujenedes dl ntendënt ala scola ladina Roland Verra, à l prof. Franco Frabboni purtà dant n referat.
Dan a na sala plëina de jënt à l assessëur Mussner giaurì l ann de scola per i nsenianc y culaburadëures. “L di dla scola ladina dëssa vester n di de ancunteda per nsenianc, maestres dla scolina y duc i culaburadëures dla scola. L ann de scola dëssa scumencé te n atumusfera positiva. Nsci ti à l assessëur fat n rendicont ai 300 presënc sun si mpëni de mëter a desposizion nfrastrutures ala scoles tla Ladinia. Ora dla nfrastrutures ie la scola da udëi tl zënter dl nteres sciche luech de furmazion. Duc i respunsabli tla scola dëssa se mpenié per na bona culaburazion cun i genitores y dé na educazion de respunsabltà. “N ne possa dal’autra pert nia mëter duc i problemes dla sozietà tl tatl dla scola” nsci Mussner. Nce te tëmps muvimentei sciche chëi dan la riforma dla scola, dëssa i 2.067 sculeies y si debujëns daniëura vester l argumënt zentrel dl nteres, se à damnadà l assessëur ala scola ladina. Chëst ann se gëura cun la puscibltà per n ann sabatich y plu flessibltà per l lëur a mez tëmp, prospetives nueves per i nsenianc. Per chël che à dan fé cun la riforma dla scola te duc si particuleresc iel mo da aspité. “L prinzip dla plurilinguistica ie tla scola ladina bele realtà – la se trata inant de sustenì l mparé de plu rujenedes y dantaprima nce de ch?la ladina”, nsci l assessëur Mussner.L ntendënt ala scola ladina Roland Verra à rujenà dla ntroduzion dla nfurmatica tla sgonda elementera, che ie da udëi schiche n arichimënt per i mëndri sculeies. Sun la riforma dla scoles à nce rujenà l prof. Franco Frabboni dla università liedia de Bulsan. Frabboni à purtà dant na panoramica generala sun la pedagogia di sistems scolastics tl'Europa y ti à dat gran pëis al problem dla neo-analfabetisazion. Dlongia l ispetëur Alfred Irsara y l diretëur dl Istitut Pedagogich Ladin Theodor Rifesser y autri rapresentanc istituzionei à nce l ntendënt ala scoles tudëscies Peter Höllrigl tëut pert al di dla scola ladina purtan ite n cuntribut nteressant.
OSP
