Atualità
Les dezijiuns prinzipales dla Junta provinziala
Ampliamënt dla RAS,daurida antizipada dl pröm aiüt a Balsan, promoziun dl trasport sön scines y d’atres dezijiuns importantes tutes incö dala Junta provinziala.
La Junta provinziala á aprové l’assegnaziun de 3,8 miliuns de euro ala RAS por amplié y potenzié i coliamënc cun l’internet asvelt tl Südtirol. La banda leria é n’infrastrotöra fondamentala por la competitivité y la digitalisaziun dles aziëndes locales deache „al é un di obietifs prinzipai y strategics dla Junta provinziala da porté l’internet asvelt ince ti raiuns rurai y de periferia“, á recordé le presidënt dla Provinzia Arno Kompatscher incö, mertesc ai 20 de setëmber, tratan la conferënza stampa edemala do la sentada dla Junta provinziala.
Implü á la Junta ince aprové les diretives por la daurida de punc de destribuziun de medejines ti Comuns cun manco de 3.300 abitanc. I Comuns interessá pó mené süa domandes al Ofize Assistënza sanitara dla Provinzia. I critérs aprová, che gnará publicá tla Gazeta ofiziala dla Regiun y sön la plata internet dla Repartiziun Sanité, reverda danter l’ater i orars de daurida, les periodes dles vacanzes, les condiziuns, les oblianzes por les apoteches, les medejines che pó gní venüdes y i cosć de gestiun dla strotöra.
N ater punt dl de dla Junta provinziala é sté incö la nominaziun, sön porposta dl presidënt Kompatscher, dla Consulta provinziala por le dërt al stüde universitar. Sciöche esperc él gnü nominé Edith Ploner, Klaus Eisendle y Simone Schmid. La repartiziun Dërt al Stüde vëgn rapresentada dala direturia Rolanda Tschuggel. I rapresentanc dla Université Lëdia de Balsan resta Günther Mathà y Francesca Nardin. I trëi rapresentanc di studënc é indere nüs y é Martin Fink, Thomas Hofer y Marco Sivieri. La Consuta por le dërt al stüde universitar á le compit da dé jö arac y da fá propostes por ci che reverda les bandides y scomenciadies te chësc setur.
Na dezijiun importanta á la Junta ince tut por ci che reverda l’ospedal da Balsan: al vëgn metü a desposiziun 4,7 miliuns de euro implü por la daurida antizipada por la fin dl 2018 de n valgönes repartiziuns dl ospedal che reverda le pröm aiüt, l’astanteria y poli-ambulatori. La soma fej pert di 610 miliuns de euro bele preodüs dala Provinzia sciöche investimënc por la modernisaziun dl ospedal da Balsan, mo che ne é nia ciamó gnüs daldöt adorá. Zënza spëises ajuntives sarál insciö poscibl da daurí denant, por la fin dl 2018 o ti pröms mëisc dl 2019, la repartiziun dl pröm aiüt, di poli-ambulatori y dla repartiziun olache i paziënc vëgn sistemá por le momënt cina canche ai röia ti reparc spezialisá.
Implü á la Junta ince incö stabilí che le vedl implant de combustiun dl refodam da Balsan gnará demolí tratan le 2017 cun n investimënt de indöt 3,4 miliuns de euro, ara á incé scomencé la prozedöra d’anulamënt dla conzesciun da frabiché autorisada dal Comun de Balsan ala sozieté ASPIAG por la realisaziun de n zënter comerzial aladô ince di arac da pert dla comisciun natöra, paesaje y svilup dl teritore, mo ince dl avocatöra provinziala. „ASPIAG á sëgn la poscibilité da presenté sües spligaziuns y la Junta messará spo te n secundo momënt tó na dezijiun definitiva sön la chestiun“, spliga le presidënt Kompatscher.
Ala fin á la Junta provinziala incö ince tut la dezijiun, sön proposta dl assessur por la mobilité Florian Mussner, da promöie le trasport intermodal dles marcianzies tres la ferata cun n finanziamënt de 9 miliuns de euro por i proscims trëi agn. La RoLa prevëiga le spostamënt dl trasport de marcianzies dal’autostrada sön les scines cun vantaji por l’ambiënt y ince por la costruziun dl tunel de basa dl Prener.
rc
