Atualità
SOS Zebra: Start por la campagna de segurëza tl Südtirol y Trentin
L’ediziun 2016/17 de SOS Zebra é gnüda presentada incö ai 29 de setëmber a Balsan. La novité prinzipala é la colaboraziun cun le Trentin.
Dal 2009 é l’obietif dla campagna de sensibilisaziun S.O.S. Zebra chël da aumenté la segurëza por les porsones sön strada, te na manira particolara i mituns y i seniors che é les categories plü debles che se möi sön strada. Por merit dla buna colaboraziun cun le Trentin él sté meso da amplié la campagna de sensibilisaziun inann ince ala Provinzia de Trënt. Le diretur de Departimënt Valentino Pagani á sotligné en rapresentanza dl assessur Florian Mussner l’importanza de na colaboraziun transfrontaliera, dantadöt por amplié les conescënzes sön n comportamënt sigü sön strada. Ince sce le numer dles vitimes sön strada é jüdes zoruch ti ultims agn, sciöche al á splighé Guido Benedetti dl Sorvisc Strades dla Provinzia de Trënt, él impó dër important da s’ativé cun na campagna de sensibilisaziun sciöche SOS Zebra che é gnüda adatada ales esigënzes locales dl raiun trentin.
Söporjö tl 80 porcënt di inzidënc vëgn i peduns investis da n veicul y te prësc trëi cuarti di caji é l’impat frontal. De conseguënza vëgnel registré gonot ferides tl raiun dl müs y dl cé, mo ince sön les iames, söl vënter y söi brac cun conseguënzes pesoces sciöche por ejëmpl n’invalidité permanënta che porta para conseguënzes ince por la sozieté y l’assistënza sanitara, á splighé Manfred Brandstätter, primar dl Sorvisc de pröm aiüt provinzial, te so referat sön les conseguënzes de inzidënc por peduns. Le presidënt dla seziun penala dla signoria da Balsan, Carlo Busato, á spo splighé les novités iuridiches por ci che reverda l’ „omizide stradal“, che prevëiga straufunges dër pesoces, cun caji olache al é preodü pënes de porjun por 12 agn. A straufunges dër rigoroses ti jará ince adincuntra i autisć che é sot al influs de alcol y droges, y chi che sorpassa y investësc porsones cun le cöce o tles vijinanzes de strisciores pedonales, á dit Busato.
„Cun la campagna de sensibilisaziun él nosc obietif da sostigní ativamënter les scores y le monn dla formaziun por tematisé y aumenté la segurëza stradala sön i percursc di mituns da jí a scora y da promöie na mobilité sostenbila por ejëmpl tres l’adoranza di mesi publics y en colaboraziun cun geniturs y scolars“, á sotligné Pagani. Dan y do la conferënza stampa á mituns y mitans dla scora elementara Karl Felix Wolff de Balsan desmostré sön la plaza Silvius Magnago ci che an pó imparé fajon n percurs cun les rodes o jon a pé.
Adöm cun l’Ökoistitut él insciö gnü lauré fora n program dër ampl por scolars y scolares dales scolines cina les scores altes. Insciö vëgnel pité por ejëmpl rodes acompagnades por descurí i prighi sön le percurs de scora, aconsiamënc sön i prighi tles vijinanzes dles scores, mostres temporanees, fujines pratiches por cuncé les rodes y aziuns de acompagnamënt di scolars a ciasa. Na gran importanza á te chësc contest la colaboraziun cun les istituziuns locales, les rapresentanzes di geniturs y di comuns, dla polizia comunala y dl consëi de vigni scora. Implü vëgnel ince metü da jí aziuns de promoziun dla mobilité sostenibla, seminars da plü dis y eserzitaziuns pratiches al Safety Park. Implü él ince preodü n valgönes scomenciadies por les porsones sura i 65 agn che reverda la segurëza sön strada.
Informaziuns dër ütles sön n comportamënt sigü tles vijinanzes de strisciores pedonales contëgn le codejel nü de „S.O.S.Zebra!“, che pó gní desciarié tosc diretamënter dales plates internet dles Repartiziuns Sorvisc Strades y Mobilité por ladin, talian y todësch. Material d’informaziun ajuntif gnará ince partí fora tles scores dal Ökoistitut y pro les portines de informaziun dl Ofize Renovamënt patent. Le placat nü de SOS Zebra sará da odëi te 54 postaziuns sön les strades prinzipales dl Südtirol y te 30 posć sön les strades prinzipales dla Provinzia de Trënt.
Video Presentaziun "SOS Zebra!"
https://we.tl/0aRwlqr4Yi
Video Conferënza stampa "SOS Zebra!"
https://we.tl/5OiLa0SJ2F
rc
Galaria dales fotografies
