Atualità
Dala Junta: ferates, adoranza paralela por n sorvisc de cualité
Por la gestiun dles linees feroviares locales laorará la Provinzia sön la gestiun paralela de SAD y Trenitalia. Aumënt dla cualité de sorvisc y sparagn di cosć.
La gestiun dles linees feroviares locales gnará planificada aladô de na formula de co-esistënza danter SAD y Trenitalia cun le fin da avëi n’adoranza efiziënta dles ferates nöies, n sorvisc de cualité alta y n ampliamënt di coliamënc direc al’intern di confins provinziai y dl’Euregio. Chësta é la proposta aprovada incö dala Junta provinziala ai 4 d’otober sön proposta dl assessur provinzial Florian Mussner. „Chësc passaje reverda dantadöt le proiet d’eletrificaziun dla linia dla Val Venuesta che prevëiga ince la cumpra de ferates nöies y la definiziun nöia di chilometri da manajé dai dui conzescionars“, á dit Mussner. Tl dagní se ampliará, insciö la proposta dla Junta, i chilometri passan cina a 2.973.000 por Trenitalia y 2.980.000 por SAD, calcolan ince les trates cina Desproch y Lienz.
Aladô dla Junta provinziala é chësta dezijiun gnüda tuta sön la basa dl vantaje plü gran por ci che reverda la cualité dl trasport, la funzionalité dles ferates y i sorvisc por i zitadins. „L’obietif é chël da svilupé la ferata tres deplü a n’alternativa de valüta y concreta en confrunt al viaje cun l’auto privat amplian ince les ofertes y i iadi“, insciö Mussner. N vantaje dess insciö ester tl dagní ince n passaje vigni 30 menüc sön la trata Balsan-Maran-Malles zënza mëssei baraté ferata a Balsan – á ajunté le presidënt Arno Kompatscher – cun ince l’ampliamënt dla trata Prener-Balsan-Maran cina Malles.
Che la coesistënza dla SAD y Trenitalia sön la linia dal Venuesta, sön la linia Maran-Balsan, sön la linia dl Prener y sön chëra de Puster é la dërta soluziun ne vëgn nia ma confermada dai punc d’odüda tecnich, finanziar y dla cualité dl sorvisc, mo ince deache al sará poscibl da sparagné sön la cumpra dles ferates. „Cun chësta soluziun sarál poscibl da sparagné 2,4 miliuns de euro deache al sará nezesciar da cumpré ma 7 ferates impede de 9 por n funzionamënt adaté dla linia dla Venuesta“; insciö l’assessur Mussner. „Al se trata de na dezijiun tecnica, nia politica, che gnará sëgn ejaminada da na mësa tecnica por ciafé na soluziun definitiva sön l’acordanza cun la SAD“, insciö Kompatscher.
rc
