Atualità
Dala Junta: d’atres dezijiuns importantes
Te süa sentada da incö á la Junta provinziala ince traté la cauziun por i proiec PPP, la formaziun di doturs jogn y la cumpra dl archif de Othmar Barth.
Ara sará de 1 porcënt dla soma totala la cauziun preodüda dl valur contratual y che i privac messará paié por presenté propostes de colaboraziun cun les istituziuns publiches. Al se trata de na scemplificaziun dles colaboraziuns PPP „Public-private partnership“ la proposta che la Junta provinziala á aprové incö ai 3 d'otober cun de conseguënza na normativa plü scëmpla y manco burocratica en confrunt dl rest dla Talia. La Junta á insciö smendrí l’import de cauziun che le privat mëss dé jö cun la domanda dal 5 porcënt al 1 porcënt dl import total dl’opera o dl sorvisc cun na porzentuala che vëgn stabilida danü caje por caje. „Al se trata de n import dër plü bas co tl rest dla Talia, olache al vëgn datrai ince damané le 10 porcënt, insciö ti vëgnel dé plü autonomia finanziara ales impreses che mëss bele investí tla fasa de preparaziun y de proietaziun“, insciö le presidënt Arno Kompatscher. Danter i ejëmpli plü garatá ti ultims mëisc él da segnalé chël dla ciasa de sojornanza por i studënc dla scora profescionala por l’agricoltöra Fürstenburg tla Val Venuesta.
N’atra dezijiun importanta dla Junta é stada l’aprovaziun dla cuota ajuntiva de 450 euro brutto al mëis por doturs jogn che fej na formaziun spezifica tl Südtirol y é portadus dl atestat dl bilinguism. „Le fin de chësta conzesciun ajuntiva é da cherié na stimolaziun implü por i doturs de medejina jogn che ó fá na formaziun speziifca de medejina generala“ á dit l’assessuria provinzala Martha Stocker che á presenté la proposta. Chësta mosöra ne vá nia ma a bëgn di doturs jogn mo ince di paziënc, deache ara garantësc na comunicaziun por todësch y talian cun i doturs.
Implü á la Junta provinziala autorisé incö la stipulaziun de n contrat por la cumpra de n fonds dl’architët Othmar Barth, nasciü tl 1927 y mort l’ann 2010 y che vëgn conscidré le pionier dl’architetöra moderna tl Südtirol. „Othmar Barth é sté l’architët plü important y inovatif südtirolej tla secunda pert dl ventejimo secul y porchël á la Junta tut incö la dezijiun da cumpré y conservé l’archif de proprieté che é na documentaziun ampla de sües ativités“, á sotligné l’assessur provinzial por i bëgns culturai FlorianMussner. Tl archif él gnü conservé indöt 240 proiec dl architët da Porsenú cun documentaziuns ajuntives de gran valüta. Le prisc por la cumpra dl archif é gnü inrescí cun n arat y reverda 270mile euro.
Le presidënt Kompatscher á ince informé che al sará en jöbia a Roma cun sön le program na seria de incuntades por traté les chestiuns di migranc, dla conzesciun dl A22, dles trates d’azes al BBT y dl sorvisc dla Posta. Por rajoné de chëstes tematiches incuntará le presidënt dla Provinzia danter l’ater le minister por l’intern Angelino Alfano, le minister por les infrastrotöres y i trasporc Graziano Delrio, i suranstanc dl ANAS y le secreter de Stat por le svilzp economich cun delega ales Postes Antonello Giacomelli.
rc
