Atualità
Prima senteda dl forum per lëures publics
OSP - „L forum per lëures publcs“ à n lunesc ai 8 de setëmber a Bulsan metù man cun si lëur. L cumité de 22 persones tën n cuntrol sun i lëures publics tl Südtirol, porta prupostes y pusciblteies de miuramënc, y fej nce la nterpretazion dla normatives che vën metudes dant. Pra la senteda de n lunesc iel unì dat pro l regulamënt intern che mostra su avisa la cumpetënzes.
L forum per lëures publcs, cun a cë l assessëur per lëures publics, ie da udëi sche na mëisa turonda di partner soziei per l frabiché danter la Provinzia, i culaburatëures dl’aministazions locheles, dla strutures per la sanità, la lia di mprenditëures, i sindacac y dla frimes de costruzion. L cumité fajerà na nterpretazion dla normatives y de chël che l vën metù dant y avrà la funzion de cunsulënza sun l da fé. Sciche l ie unì rujenà n lunësc fej l forum nce prupostes de mudé la lege. Ma dantaldut dëssa l forum cialé do i lëures publics tla Provinzia. A chësta maniera tol l forum ite l post dl’ autorità de Roma. Ora dl’urdinanza nueva sun l sëurandé de lëures publics fova nce l to jù de lëures y la respunsabltà di mprenditëures argumënc mpurtanc pra la senteda. L cumité ne à te si prima senteda mo nia dat jù n besté definitif. N auter pont al orden dl di fova l dé pro dl regulamënt intern, che regulea l lëur dl cumité. La proscima senteda dl forum sarà ai 12 de nuvëmber 2003 a Bulsan.OSP
