Atualità
Proa d’alarm dla proteziun zivila: An é arjigná ca por les emergënzes
„Döt é jü bun“ chësc é le fazit dla proa d’alarm dla proteziun zivila de incö (ai 13 d'otober) manajada dala sënta zentrala da Balsan.
Dales 10:04 él incö jü te döta la Provinzia n segnal d’alarm cun n sonn sterch y debl a intervai por fá na proa d’alarm te döt le raiun sot al coordinamënt dl’Agenzia por la proteziun zivilia cun a ce le diretur d’ofize Günther Walcher. Le segnal d’alarm é gnü dé dala Zentrala emergënza da Balsan. I colaboradus dla postaziun de coordinamënt á spo damané do sce düc i segnai á funzioné zënza problems. Dala Zentrala Viabilité él spo pié ia tres na conesciun de internet asvelt le sistem d’informaziun por la popolaziun cun ince na scrita da odëi te televijiun che damanâ da s’informé tres les staziuns radiofoniches, ince sce al ê ma na proa. Rai Südtirol, Rai Ladinia, la RAS y i 20 radio privac ciafa spo ti caji d’emergënza, mo ince incö por la proa, na noela cun les informaziuns prinzipales, sön ci che l’alarm ó dí por la popolaziun y cai che é i comportamënc da tigní te caji d’emergënza reala. Danter chisc: la chirida de n post sigü te ciases o frabicac, da stlü portes y finestres, da stodé i implanc de ventilaziun y da s’informé via radio, televijiun o la Rëi zivica. Püch dan les 10:30 é spo la proa jüda a piz.
„La proa á funzioné bun, dötes les sirenes á ringhiné y les noeles te radio y televijiun é ince gnüdes raportades, ince la segnalaziun push dl sorvisc dla proteziun zivila tres la app é gnüda menada, mo é rovada a destinaziun cun intardiamënc“, á splighé le diretur Walcher. Le alarm dla proteziun zivila vëgn ativé te caji de emergënza alta cun de gran prighi por la segurëza dla popolaziun. Chësta proa da incö fej pert dla formaziun dla popolaziun, che dess insciö gní informada sön le comportamënt plü adaté y le significat te chësc segnal d’alarm.
rc
Galaria dales fotografies
