Atualità
Fujiun di Comuns te Fascia, regoles desvalies al referendum
La consultaziun de ai 20 de novëmber ti Comuns ladines á regoles desfarëntes. I litadus de Mazin y Soraga ne podará nia fá „tomé“ le referendum.
Por ci che reverda la prozedöra d’istituziun dl Comun nü de Sèn Jan, che dess gní a se le dé tres na fujiun di Comuns de Poza y Vich y daverta ince ai Comuns de Mazin y Soraga, lascia l’Ofize Lites dla Regiun alsavëi, retifican parzialmënter le comunicat stampa de ai 10 de otober, che por la validité dl referendum consultif él nezesciar che la partezipaziun di dui Comuns de Poza y Vich mëss ester de almanco 40 porcënt di litadus y dles litadësses, cun l’estlujiun de chi che é scric ite al’anagrafe di taliagn residënc foradecá (AIRE). Le referendum ará n resultat negatif tl momënt che al ne gnará nia arjunt la porzentuala dles usc por na fujiun de almanco le 50 porcënt dles usc dades jö y varëntes ti Comuns de Poza y Vich.
La validité dl referendum (cun l’arjunta dl cuorum strutural dl 40 porcënt di litadus y dles litadësses zënza cumpedé i iscric al AIRE) y le resultat positif dl referendum (maioranza de usc por la fujiun) ti atri dui Comuns de Mazin y Soraga ará indere conseguënzes limitades ma al Comun. I litadus y les litadësses de Mazin y Soraga ne podará insciö nia determiné la “tomada” dl referendum por la fujiun de Poza y Vich (tl medemo momënt ne pó i zitadins di Comuns de Mazin y Soraga gnanca “salvé” le prozedimënt de fujiun sce le resultat di Comuns de Poza y Vich foss negatif, tres n cuorum nia arjunt o na maioranza de usc che ne foss nia por na fujiun).
Le referendum gnará tigní en domënia ai 20 de novëmber dales 08:00 ales 21:00.
rc
