Atualità
Euregio y De di Museums dl Tirol storich 2016
Costruí na rëi y renforzé la colaboraziun é stades les döes tematiches prinzipales dl De di Museums dl Tirol storich 2016 sté incö a Absam tl Tirol.
Le De di Museums dl’Euregio 2016 é gnü tigní incö, ai 14 d’otober, tl zënter cultural KIWI de Absam tl Tirol y che á albü sciöche tematica prinzipala „Costruí na rëi y n sistem: le valur implü dla cooperaziun tl ciamp museal“. Le fin dla scomenciadia é sté chël da ti pité ai operadus di museums dl Tirol, dl Trentin y dl Südtirol punc de referimënt y rëis aposta al intern dl’Euregio. La manifestaziun é gnüda daurida dal assessur por i museums Florian Mussner, dal’assessuria por la cultura dl Land Tirol Beate Palfrader y dal assessur trentin Tiziano Mellarini.
L’assessur por i museums Florian Mussner á recordé che l’importanza dla colaboraziun transfrontaliera é preziusa nia ma por cherié sinergies y sparagné ressurses, mo ince por svilupé i museums a posć plëgns de vitalité, cun contignüs d’atualité y che dëida da amplié les conescënzes scientifiches. „I museums dess ester posć de conservaziun y presentaziun di tesurs de nüsc raiuns, contribuí a renforzé l’identité, mo ince posć de stüde por ciafé le lian che unësc les cultures por svilupé y mantigní l’arpejiun culturala dl’Euregio“, insciö Mussner. Te so intervënt á l’assessuria Beate Palfrader sotligné che „les mostres itinerantes, i proiec de colaboraziun y les coleziuns de importanza suraregionala trasformëia i museums te posć d’incuntada y de colaboraziun danter le Tirol, le Südtirol y le Trentin. L’assessur trentin Mellarini á sposté spo l’atenziun sön la „colaboraziun danter les istituziuns museales publiches y privates che é n elemënt important por renforzé l’idea de n sistem museal euroregional cun ince la creaziun de n sentimënt de aldiënza al’Euregio da pert di zitadins.“ La scomenciadia culturala de incuntada di rapresentanc dl monn di museums é spo jüda inant sot ala formula di „world café“ por se baraté fora dles competënzes spezifiches dl setur, dles esigënzes concretes di operadus y dles modalités por aumenté le barat de opiniuns, proiec y scomenciadies.
Video De di Museums dl Tirol storich 2016
https://we.tl/FG7IkzHsP3
Intervista assessur Mussner por Ladin
https://we.tl/NSOpmlRnqN
File audio
rc
