Atualità
Dala Junta: Strades, metrobus, mobilité sostenibla
De plü é stades les dezijiuns dla Junta tl setur dla viabilité y mobilité che reverda le Comun de Santa Cristina, le conzet dl Metrobus y dla mobilité „vërda“.
Sön proposta dl assessur Florian Mussner á la Junta provinziala aprové incö ai 18 d’otober le program d’investimënc dl'aziënda Strotöres dl Trasport südtirolejes (STA) cina l’ann 2018 por na soma complessiva de zirca 5,5 miliuns de euro. „Cun chësta soma sarál poscibl da investí te infrastrotöres modernes por la mobilité publica“, spliga l’assessur por la mobilité Florian Mussner. L’aziënda inhouse dla Provinzia STA laora por alisiré le passaje dla mobilité privata tres de plü tl vers de n'adoranza de mesi de trasport publics y de na mobilité plü sostenibla. Intervënc de ressanamënt é preodüs danter l'ater sön les linies dles ferates Maran-Malls, dla Val de Puster y dl Renon. Al é ince preodü la cumpra de barieres cuntra la vera al Safety Park y de go kart eletrics por smendrí la vera y l’incuinamënt. Implü él preodü la cumpra de set ferates Flirt Trenitalia.
Por ci che reverda le mioramënt dla mobilité á la Junta provinziala integré ai 18 d’otober sön proposta dl assessur Mussner le program 2016-18 por i intervënc de sistemaziun y realisaziun dles strades de interés provinzial por 5,8 miliuns de euro. I Comuns interessá é Santa Cristina, Gais, Mühlbach, San Laurënz y Karneid. Tl Comun de Santa Cristina él preodü n finanziamënt de 200mile de euro por la costruziun de n sotpassaje por i peduns sön la statala dla Val Gardëna al’incrujada Hotel Diamant, 585.651 euro gnará investis tl Comun de San Laurënz por la realisaziun de barieres cuntra le desturb acustich sön la statala dla Val de Puster tla localité dl punt Peintner che porta tla Val Badia. Atri intervënc é ince preodüs ti Comuns de Leifers y Vintl.
N’atra dezijiun tl setur dla mobilité reverda l’azetanza dla proposta por l’assessur Mussner che prevëiga l’adoranza de corieres eletriches por le funzionamënt la linia urbana che coliará le parch tecnologich de Balsan cun la staziun dles ferates dl capolüch. Aladô dl conzet nü elaboré da SASA sará la linia manajada cun cater corieres eletriches cun n investimënt preodü de indöt 3 miliuns de euro che podess gní curis en pert da fonds europeics. La Junta provinziala á implü tut la dezijiun da costruí na galaria de 500 metri lungia pro l’incrujada dl Pillhof tl conzet dl proiet Metrobus danter Balsan y Kaltern. „Chësta varianta porta para de plü vantaji por popolaziun locala, l’ambiënt y en general dla viabilité sön öna dles strades plü adorades de döta la Provinzia“, insciö l’assessur Mussner tratan la conferënza stampa.
rc
