Atualità
Dala Junta: maestri dai schi, mudaziun di criters por i assistënc
Tl dagní ne messará i maestri dai schi bele abilitá nia plü fá l'ejam d’idoneité por se scrí ite ala formaziun por assistënc de n’atra categoria.
Do l’aprovaziun tl ann 2015 é i criters por ci che reverda i cursc de formaziun y ajornamënt profescional por i assistënc de scora de schi y por i maestri dai schi gnüs mudá ai 18 d’otober dala Junta provinziala. Sön proposta dl Colegium provinzial di maestri di schi él insciö gnü aprové na mudaziun, „che vá tla direziun bele scomenciada te plü seturs y che reverda na seria de scemplificaziuns de leges, regolamënc y normatives“, á sotligné le presidënt Arno Kompatscher.
Insciö ne messará i maestri de schi che á bele ciafé l’abilitaziun plü alta tles categories dl schi alpin, dla brëia y dl paslunch nia plü fá l’ejame d’idoneité nezesciar cina sëgn por podëi se scrí ite a na formaziun por assistënc de scora de schi te n’atra categoria. „Ince deache les carateristiches de basa di candidac vëgn bele analisades tratan la pröma abilitaziun ne é chësta secunda forma de ejaminaziun nia nezesciara y porchël é le prozes gnü alisiré y scemplifiché por ti jí adincuntra ai candidac y ales scores dai schi“, insciö le presidënt Kompatscher.
rc
