Atualità
Prevenziun da medefüch, film didatich dla Proteziun zivila
Vigni ann él tl Südtirol mesamënter 1400 medefüc. La Proteziun zivila á realisé n film de 25 menüc cun informaziuns ütles por i zitadins.
„Tl Südtirol vëgnel lauré dër tröp sön la prevenziun por smendrí i prighi tratan n medefüch, mo chësc ne é nia na garanzia por evité che al sozedes emergënzes. Te chisc caji de prigo vëgnel atira ativé döt l’aparat dla Proteziun zivila che garantësc standarg de segurëza dër alc por la popolaziun“, á sotligné l’assessur competënt Arnold Schuler. Y insciö é ince les zifres che reverda la Proteziun zivila südtiroleja che fej impresciun: 14 mile é i stödafüch volontars partis sö te 306 grups cun na desponibilité de 1.300 mesi, 150 é le porsones che laora pro le Corp permanënt de Balsan cun passa 100 mesi y i volontars dla Crusc blancia é indöt 2.300 (cun 33 seziuns y 200 mesi por les emergënzes y por le trasport de amará). Implü él ince 55 grups d’intervënt por le socurs alpin che vëgn daidá da dui elicoters, le socurs sön ega, les unités cinofiles y i mesi de trasport di doturs d’emergënza.
Ince sce le tëmp che passa dala segnalaziun de n medefüch ala presënza di pröms mesi d’aiüt é dër cörta él impó fondamental da conësce n valgönes regoles por i momënc atira do le scomenciamënt dl medefüch y da evité insciö conseguënzes plü granes. „Vigni porsona dess ester buna da reconësce situaziuns de prigo. Por imparé tl detai co se comporté te chëstes situaziuns él gnü realisé n film cört che dëida da stravardé se instësc, les atres porsones y da smendrí i danns“, insciö Schuler. Le film didatich é da ciafé por talian y todësch y é gnü realisé dal Ofize Prevenziun medefüch dla Proteziun zivila en colaboraziun cun le Corp permanënt di Stödafüch de Balsan, l’uniun provinziala di stödafüch volontars y la scora profescionala por le comerz, l’industria y l’artejanat Zuegg da Maran.
Dantadöt i jogn y i studënc é i destinatars de chësc film, sciöche al spliga la direturia dla scora Isolde Meraner che dij che „chësc é n contribut por na cultura dla segurëza en general, mo i video é ince ponsá por les aziëndes por sensibilisé sü dependënc.“ Le diretur dl’Agenzia por la proteziun Zivilia Rudolf Pollinger á sotligné che „les gaujies de medefüch é gonot coliades a fai de porsones y porchël él fondamental da amplié les conescënzes sön la prevenziun“. Le film che döra indöt 25 menüc é a desposiziun por düc sön le canal Youtube dla Provinzia de Balsan (www.youtube.com/ProvBolzano) olache al é gnü partí sö te set perts.
Medefüch - introduziun (por talian)
Medefüch - valutaziun dl risch de medefüch (por talian)
Medefüch - mosöres costrutives y proteziun ativa (por talian)
Medefüch - comportamënt tl caje de medefüch (por talian)
Medefüch - atrezadöres por stodé le füch (por talian)
Medefüch - control y manutenziun (por talian)
rc
Galaria dales fotografies
