Atualità
Giaurida dla ferata „Tru dla Pesc“ ai 14 de setëmber
OSP – Ora per la cresta danter i chemuns del Mareo y Ampëz passa la ferata dal inuem simbolich „Tru dla Pesc“. Chësta via unirà giaurida n dumënia ai 14 de setëmber 2003 tl cërtl de na pitla festa pra la utia Gran Fanes. Duc i nteressei avrà n dumënia nce l’ucajion de fé la via fereda cumpaniei da n mëinacrëp. Per chësta ucajion val debujën de se lascé nuté su nchin a n vënderdi ai 12 de setëmber.
Dla vies ora per la cresta che ie unides fates ntan l prima gran viëra ie l Tru dla Pesc una dla plu beles. Dan 90 ani iela unida njenieda dala trupes dl’Austria per ti ruvé permez ala linia dla front dal’autra pert dla Tofanes, sëura la Val de Travenanzes. I Parcs naturei Fanes-Sennes-Braies, Dolomiti d’Ampezzo n colaburazion cun l’associazion turistica de Mareo y i mëinacrëp dla Val Badia y da Cortina à anjenia cà da nuef l tori. La via ferata ie unida fata da nuef tl raion de Cresta de Valon Blanch al Mont C´iastel, per la Pizes da Furcia Rossa. Duc i nteressei che ulëssa fe la via ferata cumpaniei da n mëinacrëp dëssa se lascé nuté su nchin a n vënderdi ai 12 de setëmber 2003 al numer de telefonn 0474-50 61 20 o 0436-22 06. Per la Pizes de Furcia Rossa se anconten dala 7.00 a Pederü o ala Capanna Alpina. Chëi che ulëssa fe la Croda dl Valun Blanch se anconta dala 7.00 al Ponte Felizon. La escurscion finerà via cun l’ancunteda cun aperitif pra la utia de Gran Fanes. Luciana Palla de Livinalongo fajerà ilo n pitl riassunt dla tapes de majera mpurtanza dla gran viera. Duc i vijtadëures, nce chëi che à na lizënza per furné, ie te chësta ucajion priei bel de ji a pé nchin sala utia de Gran Fanes. N cajo de bur tëmp unirà la manifestazion spusteda a n sada ai 20 de setëmber 2003. L program ne unirà nia mudà.OSP
