Atualità
Dala Junta: löm vërda ala cumpra de 124 corieres cun emisciuns bases
Trasport publich plü modern y sostenibl: la Junta provinziala á aprové la cumpra de 124 corieres nöies cun n livel d’emisciun bas.
Na pert ampla di mesi de trasport en dotaziun ai conzescionars dl sorvisc de trasport local dla SAD y dla SASA mëss gní baratada fora. Por chësta gaujia á la Junta provinziala aprové incö ai 8 de novëmber la cumpra de indöt 124 corieres nöies cun n livel bas de emisciuns che incuinëia por n investimënt de indöt 38 miliuns de euro che dess gní adorá por baraté fora 132 mesi de trasport cun plü de 12 agn de vita. 86 dles 124 corieres nöies gnará adorades dala SAD, les 36 corieres che resta gnará metüdes a desposiziun ala SASA.
„Al se trata de n’operaziun che porta de plü vantaji da plü punc d’odüda – comentëia l’assessur por la mobilité Florian Mussner – y che reverda dantadöt l’ambiënt cun n smendrimënt important por ci che reverda les emisciuns. Implü pita les corieres nöies ince la poscibilité por i zitadins da podëi adoré mesi moderns y comoc, che podess ince porté a n aumënt dl anuzamënt dl trasport publich cun na diminuziun dl’adoranza de auti privac.“
Le presidënt Arno Kompatscher á ajunté che „ince sce les conzesciuns mëss gní scrites fora tl 2018 jará la Provinzia inant por modernisé i mesi dl trasport publich y da aumenté ince la cualité di standarg da respeté. Por chësta gaujia él gnü tut la dezijiun da cumpré corieres nöies y les mëte a desposiziun a SASA y SAD cina che les conzesciuns toma tl 2018“, insciö Kompatscher.
rc
