Atualità
Dala Junta: aprové le Plann por les cumpres zentralisades
La Junta provinziala á aprové le Plann 2017-18 dles cumpres zentralisades por i ënc publics elaboré dal’Agenzia provinziala por i apalc.
La lege statala 89 dl 2014 á regolamenté la figöra nöia di „sogec de agregaziun“ por la cumpra de bëgns y sorvisc: i sogec d’agregaziun sará insciö la sora staziun di apalc por la cumpra de bëgns y sorvisc, cun le vantaje da traté dötes les domandes di ënc publics y che pormët da sparagné ressures finaziares ales aministraziuns. Danter i sogec d’agragaziun él ince l’agenzia provinziala por i provedimënc y la suraverda di contrac publics, laurs, sorvisc y cumpres tl Südtirol.
La Junta provinziala á insciö aprové incö ai 15 de novëmber le Plann pro la cumpra zentralisada por i agn 2017 – 18 elaboré dal’agenzia. „Le contignü dl plann reverda les strategies de gara y les prozedöres de cumpra conscidran sides la cualité di bëgns y sorvisc sciöche ince le smendriamënt dla burocrazia y di cosć por garantí n’adoranza dles finanzies publiches plü efiziënta“, á splighé le presidënt dla Provinzi Arno Kompatscher
Danter i criters por definí le Plann unich dles cumpres él la pluralité di ënc y dles istituziuns publiches che adora le bëgn o sorvisc, na spëisa sura i 500mile euro, n program de almanco dui agn dl sorvisc o bëgn y les conseguënzes por le marce dl laur por les piceres impreses y chëres mesanes. Les convenziuns elaborades por i proscims agn prevëiga danter l’ater: l’adoranza de gas y energia eletrica, le se por les strades, les assicuraziuns, la cumpra de libri y patüc da mangé, le guant por la polizia tles cites, aparac IT y software, la manutenziun dl’imobiliar, implanc y veicui, le material y i produc por la netijia dles sëntes y frabiches.
Cun la delibera él implü gnü stabilí che l’Aziënda sanitara südtiroleja é responsabla por i bëgns y sorvisc che reverda le setur dla sanité publica südtiroleja.
USP
