Atualità
Proteziun zivila: Barieres de proteziun sura Pecëi a Lungiarü
Les abitaziuns de Pecëi a Lungiarü é gnü metüdes sot a proteziun cun la costruziun de barieres de proteziun nöies che dess stravardé da le pericul de ros.
Tl plann dles zones da prigo dl Comun de San Martin de Tor é n valgönes ciases a Pecëi tl paisc de Lungiarü tla zona cöcena. Por stravardé chëstes abitaziuns dal prigo de na ro, che podess gní a se le dé por gaujia dl Rü de Pecëi che vëgn da Cëindles jö, á l’Ofize Operes idrauliches Ost dl’Agenzia por la Proteziun zivila realisé döes barieres de proteziun.
Ti ultims dezenns ne él gnü registré degügn gragn spostamënc o fenomens dl Rü de Pecëi da Cëindles a Lungiarü tl Comun de San Martin. L’evaluaziun dles imajes dal alt y dla morfologia dl terac segnalëia te na manira tlera che tl tëmp passé él gnü a se le dé spostamënc de ros cun zones d’erojiun. Implü vëgnel ince raporté de na ro che s’á moiü dan da zirca 100 agn y che s’á archité söi pra.
Deache i esperc dl Ofize Operes idrauliches Ost dl’Agenzia por la Proteziun zivila aratâ che n intervënt tla pert alta dl raiun Cëindles ne foss nia sté poscibl, él gnü tut la dezijiun da costrí döes barieres de proteziun sura les abitaziuns de Pecëi. Les döes barieres é lungies öna 160 metri y l’atra 145 metri y altes trëi y cinch metri y é gnüdes stabilisades da de gran peres. I laurs de costruziun é gnüs completá dan da püch.
„Sce al ess da gní a se le dé na ro spo vëgn le material devié sön na pert y al é ince gnü ponsé ai spostamënc y al flus dl’ega“, spliga le diretur competënt Sandro Gius. L’investimënt é sté de indöt 195.000 euro, i laurs é gnüs fac da Heinz Baumgartner y sü colaboradus.
USP
