Atualità
„Lëur y junëza“: Acunteda dla trëi Consultes di jëuni
Jëuni tl mond dl lëur ie stada la tematica prinzipela trateda te n’ancunteda dla trëi Consultes di Jëuni a Bulsan.
Ai 18 de nuvëmber iel unì a s’l dé l’acunteda dla trëi Consultes di Jëuni dl Südtirol tl Palais Widmann a Bulsan. Chëst ann fova la tematica trateda chëla di jëuni tl mont dl lëur. Chësta ie na cuestion scialdi sentida dai jëuni, che dantaldut ti ultimi ani ie suvënz nce deventeda na tematicha ria da afrunté. Per cuestions sciche chësta iel unì metù su la trëi Consultes di Jëuni, cun la funzione de purté inant ideies y sensazions dla junëza.
Per scumencé l’ancunteda iel unì tenì n referat de impuls da Werner Pramstrahler, referënt dl IPL n cont dl mudamënt dl lauré. Chësc per dé n cheder generel dla situazion dl lëur te Südtirol y ora per l mont. l ne sarà nia plu tan saurì abiné n lëur, pra chël che n possa resté duta la vita. Tl daunì messeran vester anjeniei per mudazions.
Daldò iel unì metù a jì trëi mëises de discuscion, ulache jëuni cun na idea o n proiet che à dan fé cun l mont dl lëur, à abù l ucajion de prejenté si proiet. I 20 cumëmbri dla trëi Consultes ova pona la puscibltà de ti dé n feedback ai proiec y de ti judé a chëi che à purtà dant, per miuré l cunzet. Chësta fova na ucajion, te chëla che i cumëmbri dla Consulta à propi pudù consulté i jëuni.
Nicholas Santini à prejentà si proiet “Yob”, na puscibltà per jëuni de abiné te internet pitli lëures da fé dlongia l studio, per se davanië vel’scioldo. Sabrina Eberhöfer, cunlauradëura dla Young Caritas à spieghà ciche ie l servisc ziliv y ciuna che ie la dificulteies de abiné jëuni nteressei per chësc proiet. Felix Nagler, presidënt dl’organisazion Gadersound se à damandà coche n pudëssa ti fé al savëi ai jëuni de chësc proiet y coche n pudëssa nce i to ite tl’organisazion. “L ie nasciudes de bela ideies, che ne me fossa mei tumedes ite; l fova n domesdì scialdi creativ y nteressant”, dijova Sabrina Eberhöfer tla contlujion dl’ancunteda. Nce tl daunì saral la puscibltà de ti sté do ai jëuni y a si ideies per ti judé a deventé pert dl mont tl lëur.
USP
Galaria dales fotografies
