Atualità
Dala Junta: Aziënda sanitara y contribuc de stüde por practicums
L’assistënza di amará cronics, l’informatisaziun y le personal sará les priorités dl’Aziënda sanitara. Assëgns de stüde por practicums ma cun le bilinguism.
La Junta provinziala á stabilí incö ai 22 de novëmber i obietifs prinzipai dl’Aziënda sanitara dl Südtirol por l’ann 2017 aladô de na metoda inovativa. Al se trata de n documënt strategich che stabilësc les prozedöres y les modalités da tigní ite por le monitoraje de döta la gestiun dla sanité publica. L’assessuria por la sanité Martha Stocker sotlignëia che „la spartiziun di compic te chësc setur é tlera y scëmpla: la politica dá dant i obietifs, l’aministraziun se fistidiëia da assegné les ressurses y da efetué i controi y l’Aziënda sanitara é responsabla dl’atuaziun concreta dles mosöres.“ I obietifs por l’ann 2017 reverda insciö trëi pilastri: l’assistënza di amará croncis, la modernisaziun dl sistem informatich y la formaziun dl personal. Al é ince preodü l’elaboraziun de n plann provinzial por les maraties croniches, le svilup de n proiet de tele-medejina cun le renforzamënt de n sorvisc che reverda la maratia dl zücher, y tröp d’ater. N focus sará ince sön la digitalisaziun cun le rezetes eletroniches, la poscibilité de prenoté, paié y jí a tó i resultac dla radiologia cun n sorvisc online, sciöche ince döes app por ci che reverda la tele-assistënza y i sorvisc por les ëres en gravidanza.
N’atra dezijiun pro ci che reverda le setur dla sanité é l’aprovaziun da pert dla Junta de na mudaziun al regolamënt d’esecuziun che reverda i contribuc de stüde por i jogn che fej n practicum tl setur dla sanité tl Südtirol. Al podará ma damané do n contribut de stüde sce le candidat á superé n ejam de lingaz obligatore, sce al ne á nia bele stlüt jö positivamënter l’ejame de bi- y trilinguism A dla Provinzia. „Propi te n setur sensibl sciöche la sanité él important che l’assistënza vëgnes garantida tl lingaz dla uma“, insciö l’assessuria competënta Stocker. Le contribut de stüde por chi che á stlüt jö da püch l’Université é de 920 euro brutto al mëis por n practicum de almanco 38 ores al’edema.
USP
