Atualità
Dala Junta: ciasa de coltivaziun y archirida por Laimburg y Université
La Junta proviniziala á aprové na convenziun cun l’Université Lëdia da Balsan y la Laimburg por costruí a Vadena na ciasa dla coltivaziun por l’archirida.
La convenziun aprovada incö dala Junta provinziala prevëiga la costruziun de na ciasa de coltivaziun nöia tla sënta dl Zënter de sperimentaziun dla Laimburg a Vadena cun na spersa de indöt 200-250 metri cuadrac y na spersa ajuntiva curida cun atrezadöres speziales de zirca 200 metri cuadrac, de chisc 100 cun n tët de spidl. Al se trata de n proiet en colaboraziun cun la Laimburg y l’Université Lëdia da Balsan, i cosć preodüs é de indöt 600 mile euro y gnará finanziá dala Provinzia. Dla planificaziun, proietaziun y realisaziun gnarál inciarié l’Ofize Manutenziun frabicac.
L’Université laora bele de plü agn adöm al Zënter dla Laimburg por ci che reverda l’archirida te chësc setur, á recordé le presidënt Kompatscher. Le program dles ativités 2016 dl’Université prevëiga la creaziun de na ciasa de coltivaziun y na spersa curida por mioré l’oferta di laboratori al personal academich ti seturs ambiental y forestal y por la formaziun di studënc che fej na laurea, n master o n PhD.
Cina sëgn ne â l’Université nia a desposiziun chëstes strotöres che é nezesciares por l’archirida scientifica tl ciamp dla fisiologia dles plantes y dles coltivaziuns, y messâ insciö anuzé sperses dla Laimburg y dal Fondaziun Mach. Cun l’aprovaziun da pert dla Junta sarál sëgn poscbil da ademplí ales esigënzes tl setur dl’alimentaziun dales plantes coltivades, de n’adoranza efiziënta dles plantes agrares y dla conservaziun y gestiun dla biodiversité.
USP
