Atualità
Ciacia: renforzades les competënzes dla Provinzia
Le presidënt Kompatscher y l’assessur Schuler á presenté i contignüs y les novités do l’aprovaziun dles döes normes d’atuaziun a Roma.
„Tl Südtirol vëgn l’ativité dla ciacia praticada te na manira ejemplara ince por ci che reverda la sconanza dl monn di tiers“, á dit incö le presidënt Kompatscher tratan la conferënza stampa al Parkhotel Laurin de Balsan. Chësta argomentaziun é ince gnüda reconesciüda dal Minister dl ambiënt che á porchël ince aprové l’integraziun dla norma d’atuaziun cun l’ampliamënt dles prerorgatives provinziales. Kompatscher á rengrazié düc chi che á daidé para por arjunje chësc bun resultat. Ince por l’assessur competënt Schuler sarál meso da arjunje sëgn, sön na basa legislativa nöia, na maiú sigurté iuridica y chësc é ince n gran resultat por la politica dl’autonomia, dantadöt tl setur dla ciacia.
Les döes normes aprovades inier dal Consëi di Ministri, do na tratativa che á doré dui agn, é la basa por apliché indô les carateristiches dla Provinzia de Balsan (y de chëra de Trënt) conferman les formes dla ciacia atuales ince tl contest di parcs naturai, dantadöt ince conscidran le livel de sostenibilité ambientala y la balanza tl monn di tiers che é gnü arjunt ti ultims dezenns. Al vëgn implü reconesciü la competënza dla Provinzia da regolamenté te na manira temporana variaziuns ala lista dles sorts di tiers da ciacé preodü ince dala normativa statala, respetan le prinzip dla valutaziun dla presënza dles sorts en confrunt al teritore por garantí la sconanza dl ambiënt. Chëstes variaziuns pó ma gní a se le dé en acordanza cun le Minister por l’Ambiënt y cun n arat positif da pert dl ISPRA (Istitut por la Proteziun y l’Archirida ambientala) y da pert dl Minister por le Politiches agricoles. Contënc dl’aprovaziun dles döes normes d’atuaziun é ince le diretur dl Ofize Ciacia y Pëscia Luigi Spagnolli, che á sotligné che la ciacia, che é regolamentada cun prescriziuns tleres en armonia cun la normativa statala, pormët ince da garantí la balanza tl monn di tiers y ambiental. Le presidënt dl’Assoziaziun di iagri Berthold Marx á recordé che cun les normes nöies ne gnarál nia smendrí i standarg de segurëza.
Pro le momënt él tl Südtirol 6085 iagri ( zirca le 1,3 porcënt dla popolaziun), 335 é ëres. Les reserves de ciacia fej fora indöt na spersa de zirca 607mile hectars.
USP
Galaria dales fotografies
