Atualità
Dala Junta: aprové le Plann sanitar provinzial 2016-2020
La Junta provinziala á aprové incö le Plann sanitar 2016-2020. Le focus é sön trëi punc: prevenziun, assistënza dlungia ciasa y rëi di ospedai.
„Segurëza - Assistënza - Cualité“: chësc é le moto dl Plann sanitar provinzial 2016 -2020 aprové incö ai 29 de novëmber dala Junta provinziala. „Le plann é nosc manual cun les diretives prinzipales por ci che reverda l’assistënza sanitara en general por garantí ai zitadins segurëza tla cura y al personal na planificaziun tlera“, á dit l’assessuria Martha Stocker incö do la sentada dla Junta. Le plann é ala fin le documënt strategich por le coordianmënt y l’organisaziun di sorvisc y dles prestaziuns de sconanza, promoziun y de recuperada dla sanité. Le presidënt Kompatscher é sté contënt por l’aprovaziun, ince deache al é gnü integré le plü poscibl les propostes fates da plü perts „che garantësc n’assistënza de cualité y sorvisc che se lascia sostigní pro i ospedai“, insciö le presidënt.
Respostes ales sfidades futures
La popolaziun cun n’eté mesana tres plü alta, l’aumënt dles maraties croniches, le svilup dla medejina, la mancianza de personal spezialisé, les aspetatives dles porsones y les cornisc normatives nöies é les sfidades plü granes por l’assistënza sanitara tl Südtirol. La resposta ales sfidades é le plann sanitar nü: „Dles 98mile porsones sura i 65 agn patësc atualmënter le 75 porcënt de maraties croniches, tl 2030 sará les porsones sura i 65 agn plü de 149mile“, á recordé l’assessuria Stocker. L’aprovaziun dl Plann sanitar provinzial é gnüda se le dé do n percurs de un n ann y mez cun sura 550 partezipanc che á tut pert a discusciuns, aldiziuns, workshops adöm ai colaboradus dl setur sanitar, dles assoziaziuns soziales y dles organisaziuns di paziënc, adöm ai rapresentanc di Comuns, dles Comunités raionales y dla politica en general. Les propostes é spo gnüdes analisades da n grup de esperc cun Wolfgang Bayer, Michaela Moritz y Francesco Longo.
Assitënza tl dër’ momënt y dl dër’ post
L’obietif dl plann sanitar provinzial é chël da assiguré la basa organisativa por aumenté la cualité dl’assistënza sanitara tl dagní „cun la garanzia de n’assistënza tl dër’ momënt y dl dër’ post“, á splighé l’assessuria por la sanité. Tl zënter dl documënt, che é partí sö te 17 articui, él les porsones, la sconanza y le mioramënt de süa sanité.
I trëi pilastri dl Plann 2016-2020 é la prevenziun, l’assistënza söl teritore y chëra dlungia ciasa, la rëi di ospedai provinziai por les emegrënzes y les chestiuns de prescia. „Le conzet nü á le focus sön la sanité dles porsones y nia sön les maraties“, á ajunté Stocker fajon referimënt al’importanza dla prevenziun tres le smendrimënt dl risch de maraties y dla promoziun de bunes condiziuns de sanité.
L’assistënza dlungia ciasa reverda mosöres por n’assistënza de dorada lungia y tles vijinanzes di paziënc. Te chësc contest gnarál lauré sön n renforzamënt dla rëi danter i sorvisc sanitars y soziai söl teritore, la colaboraziun cun i infermiers che vá da ciasa a ciasa y cun la cura y assistënta tles ciases de palsa.
L’assistënza tres la rëi di ospedai provinziala reverda na maiú colaboraziun por ci che reverda la spartiziun dles prestaziuns sanitares, recordan che l’assistënza de basa y de prescia gnará garantides te düc i ospedai. Les comunités raionales de Maran, Porsenú y Bornech gnará organisades aladô dl prinzip „un n ospedai, döes sëntes“. Por düc i ospedai sará i standarg de cualité i medemi, al’intern di raiuns gnarál coordiné les prestaziuns cun seturs de spezialisaziun desfarënc aladô dla complessité dla materia. Ala fin á l’assessuria Stocker recordé che le plann sanitar confermëia n livel alt dl’assistënza sanitara tl Sütirol ince por merit dles convenziuns cun strotöres sanitares aldinfora dla Provinzia te atres Regiuns dla Talia, tl’Austria y tla Germania. „Ince do l’aprovaziun dl plann sanitar sarál nezesciar da fá adatamënc, mo le plann é gnü ponsé a na manira che an pó fa mioramënc tresfora“, á stlüt jö Stocker.
USP
