Atualità
Plann dla cuntreda nuef per S. Crestina
OSP – La prima cumiscion per la scunanza dla cuntreda à dat prò l plann nuef per l chemun de S. Crestina. Deberieda cun l plann per S. Crestina iel nce unì dat pro chël per l Vigljoch tl chemun de Lana y chël per Moritzing pra Terlan. Te Gherdëina vëniel metù sota scunanza l raion ntëur la mont de Pic.
I plann per la scunanza dla cuntreda per chemun de S.Crestina fova unì fat l 1984 y nscì fovel sën gran ëura de l lauré ora da nuef. Chësc bele davia che ntant se à mudà la diretives y la normatives sun la scunanza dla natura y cuntreda. L plann dla cuntreda neuf respetea nsci l plann urbaistich, la diretives per la proietazion y la plann LEROP- diretiva per l Südtirol. Sën ulirà i planns laurei ora mandei inant ai chemuns per i publiché y per to ite vel tëuta de posizion. Do chësc uniral mo metù dant al guviern provinziel per n besté definitf. L nserimënt dl gran raion ntëur ala mont de Sëurasass y de Pic (2363 m) tl plann dla cuntreda de S.Crestina ie la nuvità plu tlera di adatamënc y miuramënc de chësc plann che fova unì fat dan belau 20 ani. „L raion cun si prei y bosc da mont ie n post de gheneda sciche puec d’autri te na valeda tan turistica“ nsci vëniel nunzià tl scrit dl plann dla cuntreda nuef. L ie unì dat prò de stravardé de plu posc particularmënter naturei che n cunesciova bel y nce de nueves sciche l Pra dl Mandl sun Mastlé. Udù dant iel nce de mëter cunfins nueves al parch naturel Puez-Odles ntëur ala piza de Secëda per l taché adum cun la mont de Resciesa che fova unida tëuta ite tl parch naturel l ann 1999.OSP
