Atualità
„Por romagne na familia“, codejel nü sön separaziuns y devorc
Sön co afronté positivamënter crises, separaziuns y devorc: chësc é le tema tl zënter de na brosciüra nöia dl’Agenzia por la familia.
Tl Südtirol vëgn n matrimone sön cater despartí cun na separaziun o n devorz y indöt 500 mituns vëgn atocá da öna de chëstes chestiuns de crisa dla familia. Ala tematica che atoca tres deplü nosta sozieté ti él gnü dediché na brosciüra nöia dal titul „Por romagne na familia – Co afronté positivamënter crises, separaziuns y devorc“ che é gnüda presentada incö danmisdé (ai 11 de jená) tl palaz Widmann dal’assessuria Waltraud Deeg y dala direturia dl’Agenzia por la familia Gudrun Schmid. „Nosc obietif resta chël da sostigní les families y i geniturs, da ti pité n acompagnamënt, na consulënza y na formaziun adatada: da öna na pert él nezesciar da evité che les crises de matrimone ais conseguënzes che fejes gní peso la situaziun, y dal’atra pert da concretisé les speraziuns te na manira azetabla ince por i mituns“, spliga l’assessuria Deeg.
L’impëgn dla Provinzia te chësc setur é desvalí: al reverda por ejëmpl le sostëgn psicologich, iuridich, organisatif y ince finanziar cun n sostëgn ajuntif de 300mile euro por le 2017 por la consulënza ales families. L’assessuria Deeg recorda che te chësc setur él fondamental da „intergní abonora, te na manira asvelta y nia burocratica.“ La direturia dl’Agenzia por la familia Gudrun Schmid á dit che „na pert importanta dl codejel é dedicada ales conseguënzes dles separaziuns y di devorc dai punc de odüda dles finanzes y dla psicologia cun contribuc da pert de esperc.“ Rita Chiaramonte dl Departimënt istruziun y formaziun taliana á recordé por l’ocajiun che al é ince gnü a se le dé n proiet de colaboraziun cun les scores por amplié la colaboraziun danter insegnanc, families y mituns.
La brosciüra „Por romagne na familia“ é gnüda realisada dal’Agenzia por la familia en colaboraziun cun i Departimënc Istruziun y formaziun ladina, todëscia y taliana y cun les Repartiziuns sanité y politiches soziales. Fondamental é ince sté le contribut da pert dla Signora, di rapresentanc dla consulënza ales families, dles assoziaziuns y cooperatives soziales sciöche Young & Direct. Le codejel é da ciafé tla sënta dl’Agenzia pro la familia y ti raiuns soziosaniars, sciöche ince söla plata internet dla familia ala misciun www.provincia.bz.it/famiglia.
usp
Galaria dales fotografies
