Atualità
Gustav Mischí a cé dla Repartiziun Frabiché y Sorvisc tecnich
Cun le pröm de jená dl 2017 é l’injinier Gustav Mischí le diretür nü dla Repartiziun Frabiché y Sorvisc tecnich dla Provinzia.
Mischí é sté le davagnadú dl concurs scrit fora dala Junta provinziala por curí le rode de diretur dla Repartiziun Frabiché y Sorvisc tecnich dla Provinzia che cina sëgn gnê manajada dal architët Andrea Sega sciöche diretur de Repartiziun provisore. Al diretur nü ti fej l’assessur provinzial por le frabiché publich Christian Tommasini sües congratulaziuns y les aodanzes da fá le miú che ara vá süa funziun.
L’assessur Tommasini conësc bele le diretur Mischí, sides dal punt de odüda tecnich y de gestiun, canche l’assessur por le frabiché publich â ince la delega por les Infrastrotöres dal 2013 al 2015, passades spo al assessur Florian Mussner.
Gustav Mischí (dl grup linguistich ladin, nasciü ai 30 de merz dl 1972) á stlüt jö, do la madoranza te n lizeum tlassich, la laurea te inijinieria zivila portan a piz dedô positivamënter ince l’ejam de Stat. Implü á le diretur de Repartiziun nü ince fat le Master of Business Administration in Public Management (MBA). Dal 1998 inant laora Gustav Mischí al intern dl’aministraziun provinziala, naota sciöche espert pro l’Ofize tecnich Strades Nord Ost y spo ince sciöche diretur dl medemo ofize. Dal 2009 al 2014 â Mischí ince albü la funziun de vize diretur dla Repartiziun Infrastrotöres, che al á ince manajé sciöche diretur provisore dal 12 de forá dl 2014 cina ai 31 de dezëmber dl 2016.
usp
