Atualità
Ancunteda dla consulta ladina cun vijita al Ciastel Stetteneck
Chëst ann vëniel metù a ji l’acunteda dl Assessorat ala cultura ladina y dla Consulta culturela ladina a Urtijëi. N ucajon de chësc forum sun l svilup dla cultura ladina uniral nce jit a ti cialé ai mures dl Ciastel Stetteneck sun Col da Pincan te Val d’Ana.
L forum culturel ladin unirà tenì n lunesc ai 29 de setëmber. Te chësta ucajon sara l dut. Herwig Prinoth, l diretëur di lëures pra l ciastel Stetteneck a cumpanië la grupa spiegan la storia dl Ciastel te Val d’Ana. Ël ova deberieda cun l dut. Stefan Planker scuviert l ciastel sun Col da Pincan, a Urtijëi. Do la vijita ai mures dl ciastel, ntëur la cinch domesdi, uniral jit tla ustaria Val d’Ana. Te chësta ucajion rujenerà l ambolt de Urtijëi, l assessëur provinziel ladin, l vizepresidënt dl Cunsëi provinziel y presidënt dla Consulta culturela ladina y l diretëur dla ripartizion per la cultura y ntëndënza ladina. Duc i presënc pudrà pona tò posizion sun i aspec defrënc dla cultura ladina. Al forum ai 29 de setëmber ie dantaldut nviëi i presidënc y i rapresentanc dla lies cultureles, i ambolc y i assessëures chemunei ala cultura, i rapresentanc dla pluanies y dla lies per l turism. N se anconta pra l garasc dai auti „Stazion“ a Urtijëi dala trëi domesdì.OSP
