Atualità
Aiüc de prescia tles Marche: 49 dla Proteziun zivila cina en jöbia
I 49 operadus dla Proteziun zivila südtiroleja che dëida tratan l’emergënza dles gran novüdes tles Marche restará söl post plüssigü cina en jöbia ai 26 de jená.
N’unité de indöt 49 operadus dl corp permanënt di Stödafüch, di Ofizi provinziai por la sistemaziun di rüs y dl Sorvisc Strades y volontars di Stödafüch da Balsan y Porsenú é sön le post tla Regiun dles Marche por daidé da scombaté l’emergënza dles gran novüdes. La permanënza di operadus é preodüda atualmënter cina en jöbia ai 26 de jená. Le laur vá inant sön les strades dla provinzia de Ascoli Piceno cun l’adoranza de 42 mascins atrezades por delibré les strades y i posć dala nëi.
Na unité é piada ia da Balsan por baraté jö cinch operadus dl corp permanënt di stödafüch che ti dis passá á lauré tresfora por deliberé les strades dala nëi y dai lëgns tomá sön strada. Le grup é coordiné dal ispetur Martin Gasser. I Stödafüch volontars südtirolej é en aziun a Montemonaco, indere 5 operadus dl Socurs alpin BRD y 2 dl Corp nazional socurs alpin CNSAS y 3 operadus dl Socurs alpin tirolej dëida para pro l’hotel Rigopiano söl Gran Sasso che é gnü stracé demez da na lovina. Les condiziuns de laur é dër ries y le pericul de lovines é atualmënter de livel 4. Implü á la Proteziun zivila ince daidé da delibré les entrades a n coliamënt tecnich dla telefonia mobila y radio dles forzes militares y dla Proteziun zivila che é de importanza essenziala por garantí les comunicaziuns söl teritore.
usp
Galaria dales fotografies
