Atualità
Dala Junta: aprová i ddl dla reforma aministrativa dla sanité
Cun dui dessëgns de lege á la Junta provinziala aprové incö le proiet de reforma dla strotöra organisativa di sorvisc sanitars südtirolej.
La reorganisaziun dla strotöra di suranstanc y d’aministraziun di sorvisc sanitars dl Südtirol é na pert importanta dl plann dl’assistënza sanitara „Südtirol 2020“ Incö ai 07 de forá á la Junta provinziala aprové sön proposta dl’assessuria por la sanité Martha Stocker dui dessëgns de lege de reforma dla lege provinziala 7/2001. „I dui dessëgns de lege é le resultat de n prozes ampl de partezipaziun de tröc grups d’interes di seturs dla sanité, dla politica y dla sozieté zivila che á dé jö tröc arac ti ultims mëisc“, insciö Stocker. I dui dessëgns de lege – un che organisëia danü la strotöra dl’Aziënda sanitara y l’ater che müda la lege 7 – passa sëgn al’ejaminaziun dla comisciun legislativa dl Consëi provinzial denant co passé spo tl plenum.
„Do l’aprovaziun dles diretives strategiches dl’assistënza sanitara, contignüdes tl Plann sanitar provinzial, gnarál sëgn scempliché cun la proposta de lege l’organisaziun, i prozesc y la rëi di sorvisc sanitars. Dantadöt él nezesciar che le laur de scuadra sides ecuilibré por garantí ai paziënc n tratamënt adaté a düc i liví,“ spliga l’assessuria. N coordiamënt tler y n manajemënt modern é les garanzies por la reorganisaziun de n aziënda cun passa 10mile dependënc. La proposta de reforma definësc avisa la spartiziun di compic tl’assistënza sanitara südtiroleja: la politica dá dant les diretives y stabilësc le budget, l’aministraziun provinziala é responsabla dla governance y dl control, l’Aziënda sanitara se fistidiëia dla gestiun y atuaziun operativa tres na Direziun aziendala y n Consëi de gestiun.
Le ddl prevëiga la partezipaziun de dötes les figöres profescionales ales dezijiuns prinzipales y strategiches: le Consëi de gestiun sará formé dal Diretur general, le Diretur sanitar, le Diretur tecnich-d’assistënza, le Diretur aministratif, i suransatnc di 4 raiuns sanitars de Balsan, Maran, Porsenú y Bornech y l’unité organisativa por le guern clinich. Le Consëi ará la funziun de coordinamënt a livel provinzial dl’assistënza di ospedai aladô de standarg dl plann sanitar provinzial y dl’organsaziun dl prestaziuns di ospedai südtirolej.
Pro ci che reverda i doturs él preodü n raforzamënt de chësta figöra profescionala tres le Colegium por le guern clinich, n’istituziun de consultaziun cun rapresentanc da de plü figöres profescionales dl’aziënda sanitara, che gnará ajunté al Consëi di sanitars che consultëia le Consëi de gestiun atualmënter. Implü él ince planifiché che i responsabls politics y les rapresentanzes di paziënc ais ince la poscibilité da partezipé al Comitê provinzial por la programaziun sanitara y ala Conferënza di Presidënc dles Comités raionales. L’assessuria Stocker recorda che por merit dles incuntades albüdes ti raiuns él sté meso da lauré fora na proposta de reforma che tëgnes cunt dles esigënzes y dles propostes efetuades. „La verjiun finala é insciö dër ecuilibrada y azetada, i sun dër contënta dl resultat.“
usp
