Atualità
Mudamënt climatich, convëgn ala Laimburg
Plü co 80 partezipanc á tut pert al convëgn sön le clima organisé dala Laimburg y Global Forum Südtirol.
Ci conseguënzes porta pa para le surascialdamënt global y cares é pa les strategies da adté por reagí tla dërta manira? Chëstes y d’atres domandes é states tl zënter de n convëgn tl Zënter de sperimentaziun dla Laimburg che é gnü organisé en colaboraziun cun le Global Forum Südtirol. La chestiun é gnüda aprofondida da de plü punc d’odüda dal espert de dlacia südtirolej Georg Kaser, professur dl Université de Desproch. Da dezenns vëgnel fat vari inant tl monn dl’Archirida por prové da smendrí l’impat dles conseguënzes dl surascialdamënt global, cun n resultat arjunt tl 2015 pro la Conferënza de Paris cun n’acordanza che é gnüda firmada da bëgn 195 Paisc de döt le monn.
„Por ti jí decuntra ai cambiamënc climatics él nezesciar da smendrí te na manira asvelta les emisciuns che incuinëa. I efec él düc che pó odëi: zirca le 40 porcënt di dlacia al monn é gnüs danejá te na manira che ne vá nia plü da archité“, spliga Kaser. Le fondadú dl Global Forum Südtirol Christian Girardi é dla minunga che le contribut de „Kaser sides fondamental por elaboré na strategia a livel local“. Le diretur dla Laimburg Michael Oberhuber á orü alzé fora por l’ocajiun „che la strotöra dla Laimburg é la plataforma ideala por svilupé chisc rajonamënc. Da agn laorun adöm cun le Global Forum Südtirol por anuzé al miú les sinergies por apliché i resultac dl’archirida al monn dl’agricoltöra.“
usp
