Atualità
Dala Junta: banda leria, 7 miliuns por le program 2017
Al é gnü aprové le program da 7 miliuns de euro por l'ampliamënt dl’infrastrotöra che reverda la banda leria. Laurs preodüs ince a Pruca y tla Val Badia.
Rové da arjigné ca i coliamënc zentrai, arjunje les ultimes 22 dles 155 zentrales Telecom, y conzede insciö a families y impreses da adoré l’internet aslöm, chël ó dí danter i 7 y i 20 megabit al secunt: chësc é le fin dl program 2017 dla rëi a banda leria aprové incö (ai 7 de merz) dala Junta provinziala, che á sciöche travert da ti conzede al 99,5% dla popolaziun dl Südtirol da avëi a desposiziun n coliamënt ADSL por mirit dl completamënt dl’ultima milia da pert di Comuns. “Na banda leria efiziënza y funzionanta – á comenté dan da püch le presidënt dla provinzia Arno Kompatscher – é n’infrastrotöra de chëra che an ne pó nia fá a manco, nia ma por ci che reverda nüsc zitadins, mo dantadöt nostes impreses”. “Le completament dla rëi indlunch pó ti conzede a dötes les families y ales impreses da ti rové pormez a coliamënc web aslöm – confermëia l’assessuria por l’informatica Waltraud Deeg - y é öna de notes priorités strategiches, nia ma por la digitalisaziun, mo ince por la competitivité dl raiun”.
Por ci che reverda l’ann che á metü man dan da püch, é i fonds che vëgn metüs a desposiziun de 7 miliuns de euro, cun chi che an pó rové le coliamënt ala rëi telematica provinziala te fira otica de dötes les 155 zentrales Telecom tl Südtirol. Chësc conzedará a chi che é te n raiun de 3 chilometri dales zentrales da ti rové pormez ai coliamënc web aslöm. An jará inant ince cun i laurs de metüda dla fira otica aper dles rëis zentrales dl teritore, mëton dantadöt averda ai raiuns periferics, cina a arjunje i punc zentrai de destribuziun di comuns, i PoP. Cina le pröm mez ann gnarál stlüt jö le coliamënt Pruca-Laiun, al gnará metü i ros por porté la fira otica tla Val d’Ultimo (la metüda dla fira gnará apaltada tla secunda pert dl 2017) y la banda leria arjunjará n valgönes localités periferiches sciöche Proves, Lauregno, Aldino, Trodena y Anterivo. Ti pröms mëisc dl 2017, indere, gnarál apalté danter i atri laurs por dui loc dla rëi zentrala Balsan-Porsenú, por le coliamënt danter Balsan y Sarentino y por chëra danter Salorno y Roverè della Luna, olache al é preodü le coliamënt cun la rëi trentina. An aspirëia ince, a s’anuzé le miú che ara vá les sinergies te chës localités olache al é bele preodü intervënc por la realisaziun de d’atres infrastrotöres da pert sides di Comuns, che dles aziëndes energetiches, dantadöt a Rio Pusteria (coliamënt cun Maranza), tla Val Badia (La Ila-San Ciascian) y a Villabassa.
USP
