Atualità
Le Presidënt dla Junta provinziala sura la santificaziun dl pater Freinademetz
Sciöche avenimënt dëgn da gni recordè y de gran importanza, nia ma por la Dlijia de Südtirol, mo tla medema mosöra por döt le raiun de Südtirol, definësc le Presidënt dla Junta provinziala la santificaziun dl prou da Oies, Ojöp Freinademetz, da en domënia, ai 5 de otober 2003 a Roma. Por i Ladins è chësta sambëgn ciamò na maiù ligrëza dal momënt che le Sant à dagnora dër aprijé y tignì alalt da ester n ladin. Chësta è la minunga dl presidënt dla Junta provinziala te süa relaziun injuntada.
En domënia ai 5 de otober vëgn siur Ujöp Freinademetz detlarè sant a Roma. Chësc é n avenimënt dëgn da gnì recordè y de importanza nia ma por la Dlijia de Südtirol mo tla medema mosöra inće por nosta provinzia. I tolarà pert personalmënter ala festa por la santificaziun sön plaza San Pire a Roma.Freinademetz é le pröm nasciü te nosta provinzia che vëgn detlarè sant dal Papa cun na festa solena. Al é insciö le pröm sant de Tirol; porchël é chësta por nos düć n´ocajiun de ligrëza y reconoscënza dantadöt por le mënder y plü vedl grup etnich de nosta provinzia, por i Ladins. Intratan süa vita ê le pater Freinademetz dër tachè a süa patria te Tirol y ćinamai do avëi vit dezenns de agn te süa misciun tla Cina baudiâl che al ti incresciô. Al ê avisa tan brau da ester n Ladin bele intratan so tëmp de stüde a Porsenù. Da dagnora incà à la fede cristiana raîsc dër sotes tla Ladinia y por dezenns él gnü tröc proi fora dles valades ladines. Propi deache la jënt ladina manifestëia na gran religiosité ti stôl a cör ai mëmbri dl govern provinzial de Südtirol de dè n contribut por revalorisé la ćiasa nadè dl pater Freinademetz a Oies tla Val Badia y la fà deventè n post dëgn por le recordè y le venerè.
Sciöche sant nü gnarà nosc tiroleje inće onorè ti posć olache al à vit por agn alalungia süa misciun tla Cina. Le pater Freinademetz é stè bun da s´ausé ite sides ala tera che ala jënt, al à completamënter surantut la manira de vire cineja ćina a rové a ćiarè fora sciöche n cineje y a dì de orëi ester n cineje inće sö al cil. Insciö ćiarâ le pater Freinademetz bele dan da cënt agn danfora, al à salpü da aprijé le valur dla cultura cineja y al à orü defëne sü cineji che gnô laôta desprijà dales potënzes coloniales sciöche jënt de secunda tlassa. Le pater Freinademetz s´à insigné a vire respetan cultures y razes desvalies; por chësc pol gnì conscidré n ponsadù che s´é jü danfora sciöche ejëmpl por nosta manira d´intëne la colauraziun al svilup.
OSP
