Atualità
Sorvisc Strades 2017: 4,5 miliuns de euro por 23 inciaries a aziëndes
Assessur Mussner: intervënc aladô dla lista de priorités te düc i raiuns dl teritore sütirolej por garantí na mobilité efiziënta y capilara
La Repartiziun Sorvisc Strades dla Provinzia á bele assegné tl 2017 indöt na seria de apalc por 23 intervënc desvalis. L’investimënt complessif é de 4,5 miliuns de euro. L’oferta economicamënter plü convegnënta é gnüda fata te düc i caji da dites locales. „La surandada di laurs dl Sorvisc Strades é insciö ince n bun investimënt por l’economia locala de düc i raiuns südtirolej“, á dit l’assessur por la rëi stradala Florian Mussner che á ajunté, che la basa por na mobilité moderna y efiziënta é strades mantignides bun cun vantaji por i autsć, l’economia locala, i turisć y ince por l’anuzamënt dl trasport publich da pert di zitadins.
I laurs vëgn organisá sön la basa de na lista de priorités prezisa, sciöche al recorda l’assessur. Dl’atuaziun y dl’aprovaziun dl program di intervënc se fistidëia la Repartiziun Sorvisc Strades, che chësc ann é bele gnü a se le dé de jená dl 2017 cun de conseguënza na publicaziun antizipada de de plü gares y cun le scomenciamënt abonora di laurs de dortoraziun dles strades . N fatur che pormënt ince al’economia locala de se renforzé.
Les operes realisades reverda intervënc de metüda en segurëza, laurs da mët jö asfalt y da mudé i guardrail y i mürs de sostëgn: chësta varieté de laurs porta ince para che de plü dites y aziëndes pó to pert ales bandides de concurs. Tl respet dles normes, recorda l’assessur Mussner, jará la Provinzia inant sön la strada da scrí fora bandides ince tl dagní por les impreses locales.
USP
